कोल्हापूर : जिल्ह्यातील लघु पाटबंधारे प्रकल्प, पाझर तलाव; तसेच कोल्हापूर पद्धतीच्या बंधाऱ्यांच्या दुरुस्तीसाठी विशेष मोहीम आखण्यात येणार असल्याचे पालकमंत्री चंद्रकांत पाटील यांनी सांगितले.

याचे सर्वेक्षण येत्या दोन महिन्यांत संबंधित यंत्रणांनी पूर्ण करावी. त्यानुसार दुरुस्तीसाठी आवश्‍यक तो निधी उपलब्ध करून द्यावा, असे आवाहन त्यांनी केले. जिल्हा नियोजन समितीच्या बैठकीत ते बोलत होते. जिल्हा नियोजन समितीची बैठक श्री. पाटील यांच्या अध्यक्षतेखाली जिल्हाधिकारी कार्यालयाच्या महाराणी ताराराणी सभागृहात झाली, त्या वेळी ते बोलत होते.

जिल्ह्यातील चार तालुक्‍यांत दुष्काळसदृश परिस्थिती निर्माण झाली असून, या तालुक्‍यातील जनतेला दुष्काळाच्या सर्व सुविधा आणि सवलती प्राधान्याने उपलब्ध करून दिल्या जातील. राज्याच्या अन्य जिल्ह्यांत दुष्काळाची गंभीरस्थिती निर्माण झाली असून, या भागातील दुष्काळग्रस्तांना सहायभूत होण्याच्या दृष्टीने कोल्हापूर जिल्ह्यात कृषी विभागाच्या माध्यमातून चारा लागवडीचा महत्त्वाकांक्षी प्रकल्प हाती घेण्यात येणार आहे. कृषी विभागाने जिल्ह्यातील अधिकाधिक शेतकऱ्यांना चारा लागवड करण्यासाठी प्रोत्साहित करावे. शेतकऱ्यांनी निर्माण केलेला चारा मार्च-एप्रिलमध्ये दुष्काळाची तीव्रता असताना शेजारच्या सांगली, सोलापूर, सातारा जिल्ह्यांतील दुष्काळग्रस्तांच्या जनावरांसाठी उपलब्ध करून देता येईल.

बैठकीस उर्वरित महाराष्ट्र वैधानिक विकास मंडळाचे अध्यक्ष डॉ. योगेश जाधव, आमदार सुरेश हाळवणकर, आमदार डॉ. सुजित मिणचेकर, आमदार उल्हास पाटील, आमदार सत्यजित पाटील, आमदार अमल महाडिक, आमदार चंद्रदीप नरके, पश्चिम महाराष्ट्र देवस्थान समितीचे अध्यक्ष महेश जाधव, जिल्हाधिकारी अविनाश सुभेदार, जिल्हा परिषदेचे मुख्य कार्यकारी अधिकारी डॉ. अमन मित्तल, पुणे विभागाचे उपायुक्त उत्तम चव्हाण, जिल्हा नियोजन अधिकारी सरिता यादव, समाजकल्याण विभागाचे सहायक आयुक्त बाळासाहेब कामत आदी उपस्थित होते.