सिंधुदुर्ग ः  सिंधुदुर्ग जिल्ह्यात रविवारी (ता. २१) रात्रीपासून पावसाचा जोर वाढला आहे. काही भागांत जोरदार सरी कोसळत असून काही भागांत पावसाची रिपरिप सुरू आहे. दरम्यान भातलावणीची ९० कामे पूर्ण झाली आहेत. काही शेतकऱ्यांनी नाचणी लागवडीला सुरवात केली आहे. जिल्ह्यात मागील चार-पाच दिवसांपासून किरकोळ पाऊस सुरू होता. पाच ते दहा मिनिट पाऊस झाल्यानंतर दिवसभर कडक उन्ह असेच चित्र मागील काही दिवसांत पाहायला मिळत होते. परंतु, रविवारी रात्रीपासून पावसाचा जोर वाढला आहे. रात्री पावसाच्या चांगल्या सरी कोसळल्या. सोमवारी (ता. २२) सकाळी सुध्दा काही भागांत पावसाच्या दमदार सरी कोसळल्या तर काही भागांत पावसाची रिपरिप सुरू आहे. दरम्यान, जिल्ह्यातील भातलावणीचे काम अतिंम टप्प्यात असून आत्तापर्यंत ९० टक्के लावणी पूर्ण झाली आहे. येत्या दोन-तीन दिवसांत भातलावणीची कामे पूर्ण होण्याची शक्यता आहे. काही शेतकऱ्यांनी नाचणी रोपे लागवडीला सुरवात केली आहे.