जालना/लातूर : पंतप्रधान नरेंद्र मोदी यांनी रविवारी (ता. २२) ‘जनता कर्फ्यू’चे आवाहन केले होते. याला जालना, लातूर जिल्ह्यांतील ग्रामीण भागात, खेड्यापाड्यांत, वाड्या, वस्त्यांवर, तांड्यात, गल्लीबोळात मोठा प्रतिसाद मिळाला. लोकांनी घरात बसणे पसंत केले. ऊसतोड मजुरांनीही कोपीवर बसूनच आराम करणे पसंत केले.

कोरोना विषाणूची लागण होऊ नये यासाठी विविध माध्यमांतून खबरदारी घेतली जात आहे. सर्व स्तरातील लोकांकडून जनजागृती केली जात आहे. कोरोना विषाणूचा संसर्ग रोखण्यासाठी शासन पातळीवर तातडीने उपाययोजना सुरू आहेत. 

कुंभार पिंपळगाव परिसरात अनेक शेतात, माळरानावर, आखाड्यावर ऊसतोड मजूर राहत आहेत. कोरोनाच्या धास्तीने या मजुरांनीही रविवारी (ता. २२) जनता कर्फ्यूत सहभाग नोंदवला व घरीच थांबणे पसंत केले.