शिर्डी, जि. नगर   ः घरकुलाचा लाभ देण्यासाठी शिर्डीला आलेल्या पंतप्रधान नरेंद्र मोदी यांनी येथील जनतेला ‘कसं काय, बरं आहे ना,’ असे मराठीतून विचारले. मात्र ‘अजिबात बरं नाही,’ असे त्यांना ठासून सांगण्याचे धाडस करून फक्त महाराष्ट्रातील जनताच त्यांना जाब विचारेल, असे सांगत शिवसेनेचे पक्षप्रमुख उद्धव ठाकरे यांनी भाजपवर जोरदार टीका केली.

शिर्डी लोकसभा मतदारसंघातील कार्यकर्त्यांचा मेळावा घेऊन रविवारी (ता. २१) श्री. ठाकरे यांनी लोकसभा निवडणुकीचे रणशिंग फुंकले. या मतदारसंघातून लोकसभेची उमेदवारी पुन्हा खासदार सदाशिव लोखंडे यांनाच मिळेल, असे त्यांनी जाहीर केले.

श्री. ठाकरे म्हणाले, की पंतप्रधान मोदी खोटी जाहिरातबाजी करून दिशाभूल करतात. त्यांनी दिलेली आश्वासने पूर्ण केली नाहीत. खासदार लोखंडे शेतकऱ्यांबरोबर उपोषणास बसतात. ते कधीही व्यक्तिगत कामे घेऊन माझ्याकडे आले नाहीत. त्यांना पुन्हा दिल्लीत पाठवायचे आहे. राज्याचे विरोधी पक्षनेते राधाकृष्ण विखे पाटील गुळमुळे विरोधी पक्षनेते आहेत. त्यामुळे त्यांच्यावर विश्‍वास नाही. जनतेकडून खोटे वदवून घेणारी जाहिरातबाजी करणाऱ्यांचे बुरखे फाडून वास्तव लोकांसमोर आणण्याचे काम शिवसेनेच्या गटनेत्यांनी लोकसभा निवडणुकीपूर्वी करावे, असे श्री. ठाकरे यांनी सांगितले.