पुणे ः सरकारने सत्तेवर येण्याअगोदर गरीब व गरजूंना फक्त दहा रुपयांत जेवण उपलब्ध करून देण्याची घोषणा केली होती. त्याची अंमलबजावणी येत्या २६ जानेवारीपासून सुरू करण्यात येणार आहे. पुणे जिल्ह्यात सुमारे ५०० ठिकाणी शिवभोजन योजना सुरू करण्याचे नियोजन आहे. त्यानुसार सुरुवातील पुणे शहरात शिवभोजन केंद्र अकरा ठिकाणी सुरू करण्यात येणार आहे.

पहिल्या टप्प्यात जिल्ह्याच्या मुख्यालयी किमान एक भोजनालय सुरू करण्यात येणार आहे. पुणे आणि पिंपरी चिंचवड शहरात अशा दोन ठिकाणी शिवभोजन सुरू होणार आहे. या दोन्ही शहरात मिळून एक हजार ५०० नागरिकांना अवघ्या दहा रुपयांत जेवण मिळणार आहे. यासाठी नुकतीच एक आढावा बैठक घेण्यात आली होती. हे जेवण दुपारी १२ ते २ या वेळेत नागरिकांना उपलब्ध करून दिले जाणार आहे. यासाठी जागेचा शोध आणि कोणत्या संस्था पुढे येऊ शकतात.

याविषयीचा आढावा नुकताच पुरवठा विभागातील अधिकाऱ्यांनी घेतला होता. शिवभोजनालय सुरू करणाऱ्या व्यक्तीकडे स्वतःची आवश्यक तेवढी जागा असणे आवश्यक आहे. योजना राबविण्यासाठी सद्य:स्थितीत सुरू असलेल्या खानावळी, महिला बचतगट, भोजनालय, रेस्टॉरंट, अशासकीय संस्था यापैकी एका सक्षम असलेल्या भोजनालयाची निवड केली जाणार आहे. त्याचबरोबर या भोजनालयामध्ये एकाचवेळी किमान २५ लोक जेवण करण्यासाठी बसू शकतात, एवढी आसन क्षमता असणे आवश्यक आहे.