मुंबई :  राज्यातील दुष्काळप्रश्नी राष्ट्रवादी काँग्रेसचे अध्यक्ष शरद पवार यांनी शुक्रवारी मुख्यमंत्री देवेंद्र फडणवीस यांची भेट घेतली. या भेटीत पाऊस सुरू होईपर्यंत जनावरांसाठीच्या चारा छावण्या बंद करू नका, तसेच पाणीपुरवठा करणारे टँकर सुरूच ठेवावेत, अशी मागणी करण्यात आली. यासंदर्भात सरकारने याआधीच निर्णय घेतल्याचे श्री. फडणवीस यांनी या वेळी सांगितले.

पावसाचे आगमन लांबल्याने ग्रामीण भागातील दुष्काळाची दाहकता वाढली आहे. लोकसभा निवडणूक संपल्यानंतर श्री. पवार यांनी दुष्काळग्रस्त गावांचा दौरा करून शेतकऱ्यांशी संवाद साधला होता. काही दिवसांपूर्वी श्री. पवार यांनी बारामती तालुक्यातील दुष्काळग्रस्त गावांना भेट दिली होती. या पार्श्वभूमीवर श्री. पवार यांनी मुख्यमंत्र्यांची ‘सह्याद्री’ या शासकीय अतिथीगृहावर भेट घेतली. या भेटीत दुष्काळावर चर्चा झाली. या वेळी विधिमंडळ पक्षाचे नेते अजित पवार, बारामतीच्या खासदार सुप्रिया सुळे, आमदार दत्तात्रय भरणे तसेच मदत आणि पुनर्वसन, जलसंपदा विभागाचे अधिकारी उपस्थित होते.

बारामतीसह अनेक दुष्काळी भागात पिण्याच्या पाण्याचा प्रश्न गंभीर आहे. जोपर्यंत पाऊस सुरू होत नाही तोपर्यंत टँकरचा पाणीपुरवठा बंद करू नये, अशी मागणी बैठकीत करण्यात आली.

दरम्यान, पत्रकारांशी बोलताना अजित पवार यांनी बैठकीत बारामतीच्या पाण्याच्या मुद्दा उपस्थित करण्यात आल्याची माहिती दिली. दुष्काळग्रस्त तालुक्यांचे पाणी बारामतीला पळविले जात असल्याचा वाद पुढे आणू नये. पाण्याची पळवापळवी झालेली नाही. सध्या कुठल्याच धरणात पाणी नाही. पाण्याच्या संदर्भात कालवा सल्लागार समितीच्या बैठकीत निर्णय होतात. समितीचा जो निर्णय झाला आहे त्याप्रमाणे पाणी वाटप होणार, असेही पवार म्हणाले.

दरम्यान, राष्ट्रवादीचे १० आमदार वंचित बहुजन आघाडीच्या संपर्कात असल्याचा प्रकाश आंबेडकर यांचा दावा अजित पवार यांनी खोडून काढला. त्यांच्या दाव्याला काडीचाही आधार नाही. हा दावा खोटा आहे. आंबेडकर यांनी त्यांच्या संपर्कात असलेल्या एका तरी आमदाराचे नाव सांगावे, असे आव्हान श्री. पवार यांनी दिले.