कोल्हापूर : सातव्या वेतन आयोगाच्या मागणीसाठी येथील राजर्षी छत्रपती शाहू महाराज कृषी महाविद्यालयाच्या कर्मचाऱ्यांनी मंगळवारी (ता. २७) आंदोलन केले.

अनुज्ञेय ठरणारी तीन लाभांच्या सुधारित सेवांतर्गत आश्वासित प्रगती योजनेसहीत सातवा वेतन आयोग पूर्वलक्षी प्रभावाने लागू करण्यात आलेला नाही. तो लागू व्हावा यासाठी हे आंदोलन झाले. सकाळी दहा वाजता मुख्य इमारतीसमोर सामाजिक अंतर राखत कर्मचारी एकत्र आले. काळ्या फिती लावून श्रमदान करत आयोग लागू करण्यास विलंब होत असल्याचा निषेध करण्यात आला.

समन्वय संघाच्या वतीने डॉ. अशोक पिसाळ, डॉ. संग्राम धुमाळ, डॉ. ज्योती यादव, डॉ. पुष्पांजली भोसले यांनी तर सेवानिवृत्त कर्मचाऱ्यांच्या वतीने डॉ. पांडुरंग मोहिते यांनी महाविद्यालयाचे सहयोगी अधिष्ठाता डॉ. शिवाजीराव शिंदे व सहायक कुलसचिव रमेश लोखंडे यांना मागणीचे निवेदन दिले. कृषी महाविद्यालये, विभागातील सर्व कृषी संशोधन केंद्र, व तंत्र महाविद्यालयातील कर्मचारी यात सहभागी झाले.