पुणे : साखर कारखान्यांकडे लक्षावधी टन साखर पडून असल्याने आर्थिक ताण असतानाही आतापर्यंत ७७ टक्के एफआरपी अदा केली आहे. त्यामुळे सात हजार कोटींपेक्षा जास्त रक्कम राज्यातील शेतकऱ्यांच्या खात्यात जमा झाली आहे.    राज्यातील १८२ साखर कारखान्यांनी शेतकऱ्यांकडून ४२२ लाख २३ हजार टन ऊस डिसेंबरअखेर खरेदी केला होता. एफआरपी कायद्यानुसार शेतकऱ्यांना १४ दिवसांच्या आत ९ हजार १४८ कोटी रुपये देणे बंधनकारक होते. आर्थिक ताण असून कारखान्यांनी १५ जानेवारीपर्यंत यातील सात हजार ११८ कोटी रुपये शेतकऱ्यांना दिले आहेत. एफआरपीचे वितरण बघता ११५ कारखान्यांनी दोन हजार कोटींपेक्षा जास्त रक्कम थकवली आहे. ही रक्कम देय एफआरपीच्या २२ ते २३ टक्क्यांच्या आसपास आहे. ६७ कारखान्यांनी मात्र १०० टक्के एफआरपी दिली आहे, अशी माहिती साखर आयुक्तालयाच्या सूत्रांनी दिली.  गेल्या हंगामात याच कालावधीपर्यंत १३६ कारखान्यांनी अवघे दोन हजार ९६० कोटी रुपये शेतकऱ्यांना एफआरपीपोटी दिले होते. म्हणजेच यंदा कारखान्यांनी आतापर्यंत चार हजार कोटी रुपये गेल्या हंगामापेक्षा जादा दिलेले आहेत. गेल्या हंगामात याच कालावधीपर्यंत राज्यातील ८८ कारखान्यांनी ९६९ कोटी रुपयांची एफआरपी थकवले होते. यंदा ही संख्या वाढली आहे.  गेल्या वर्षीचे ३४३ कोटी थकीत मागील हंगामातील एफआरपीचे ३४३ कोटी रुपये मात्र अजूनही शेतकऱ्यांना देण्यात आलेले नाहीत. ही रक्कम व्याजासह शेतकऱ्यांना देणे बंधनकारक राहील. गेल्या हंगामात देखील जुन्या थकीत एफआरपीचा आकडा ३८४ कोटींच्या आसपास होता. यंदा तो ४० कोटी रुपयांनी कमी दिसतो आहे. दृष्टिक्षेपात साखर हंगाम