अमरावती : निकृष्ट दर्जाच्या बियाण्यांमुळे जिल्ह्यात शेतकऱ्यांना उगवण विषयक समस्येचा सामना करावा लागला होता. या प्रकरणात अद्यापपर्यंत कंपन्यांद्वारे ८६७ सोयाबीन बॅग व ७७ लाख रुपयांची भरपाई शेतकऱ्यांना देण्यात आली.

खरीप हंगामाच्या सुरवातीला शेतकऱ्यांना सोयाबीनच्या निकृष्ट दर्जाच्या बियाण्यांचा पुरवठा झाला. त्यामुळे अमरावतीसह राज्याच्या अनेक भागात शेतकऱ्यांच्या बियाणे संदर्भाने लाखो तक्रारी झाल्या. एकट्या अमरावती जिल्ह्यात ४७३२ शेतकऱ्यांनी सुमारे पन्नास हजार हेक्‍टरवरील बियाणे उगवले नसल्याच्या तक्रारी कृषी विभागाकडे केल्या.

शासनाच्या आदेशानुसार कृषी विभागाने या तक्रारींची नोंद घेत पंचनाम्याची कारवाई केली. यातील ३०४८ तक्रारी मध्ये तथ्य आढळून आले. त्याच्या परिणामी कृषी विभागाने कंपन्यांशी संपर्क साधत त्यांना शेतकऱ्यांना परतावा करण्याचे निर्देश दिले. त्यानुसार कंपन्यांकडून ८६७ बॅग ७७ लाख रुपयांची भरपाई शेतकऱ्यांना देण्यात आल्याची माहिती कृषी विभागाने दिली आहे. जिल्ह्यात एकूण ७३ बियाणे कंपन्यांविरोधात शेतकऱ्यांनी तक्रारी केल्या होत्या.   अठरा कंपन्यांविरुद्ध कारवाई बियाणे नियम १९६८ मधील २३ (ए) (२) या तरतुदीनुसार कृषी विभागाने १८ बियाणे कंपनीविरुद्ध कायदेशीर कारवाईचा मार्ग अवलंबिला आहे. सुरवातीला शेतकऱ्यांनी बियाणे उगवण विषयक तक्रारी केल्यानंतर भरपाई देण्यात यावी की कारवाई करावी अशी संभ्रमावस्था होती. त्यानंतर शासनाकडून कारवाईचे निर्देश देण्यात आले.

प्रतिक्रिया... महाबीज कडून २८.७७ लाख रुपये व ३२७ बॅग बियाणे परतावा देण्यात आला. खासगी कंपन्यांकडून ५४० बॅग व ४८.२४ लाखाची भरपाई देण्यात आली. भरपाई नाकारणाऱ्या अठरा प्रकरणात गुन्हे दाखल करण्यात आले आहेत. -विजय चवाळे, जिल्हा अधीक्षक कृषी अधिकारी. तक्रारी : ४७३२ भरपाई प्राप्त शेतकरी : ११७९ भरपाईपासून वंचित : ३५५३ बियाणे दोष प्रकरणे : ३०४८