हिंगोली ः हिंगोली जिल्ह्यातील वसमत तालुक्यातील सेंद्रिय शेतमाल उत्पादक शेतकऱ्यांनी एकत्र येऊन उत्पादनांच्या मार्केटींग तसेच विक्रीसाठी सेंद्रिय ग्राहक मंडळ या नावाने व्हॅाटसअॅप ग्रुप स्थापन केला आहे. या ग्रुपव्दारे सेंद्रिय भाजीपाला, डाळी, हळद पावडर, कच्ची हळद, गूळ पाक, खपली गहू, घाण्याचे तेल आदी उत्पादनांची आठवड्यातील तीन दिवस घरपोच विक्री केली जाते. परंतु सध्या ‘कोरोना’ विषाणूच्या संसर्गाच्या पार्श्वभूमीवर आठवड्यातून एक दिवस घरपोच भाजीपाला विक्री केली जात असून ग्राहकांपर्यंत भाजीपाला पोचवितांना योग्य ती दक्षता घेतली जात आहे.

वसमत तालुक्यातील पांगरा सती येथील संजय शिंदे, ममदपूरवाडी येथील डॅा. हरिदास जटाळे, लिंगी येथील बालाजी यशवंते, हयातनगर येथील गंगाधर साखरे या शेतकऱ्यांच्या संकल्पनेतून सुमारे पाच वर्षापूर्वी सेंद्रिय ग्राहक मंडळ या नावाने व्हॅाटसअॅप ग्रुपची स्थापना करण्यात आली. त्यात धानोरा (ता. वसमत) येथील शेतकरी दादाराव राऊत यांच्यासह पाच शेतकरी ग्रुपमध्ये दोन अडीच वर्षापूर्वी सहभागी झाले. या ग्रुपमध्ये वसमत शहरातील नियमित सेंद्रिय शेतमाल व प्रक्रिया उत्पादने खरेदी करणाऱ्या 80 ते 85 ग्राहकांचा समावेश आहे.

या ग्रुपवर दररोज शेतातील उत्पादनाची माहिती टाकली जाते. त्यानंतर ग्राहक मागणी करतात. त्यानुसार दादाराव राऊत आणि त्याचा मुलगा योगेश राऊत हे आठवड्यातील तीन दिवस भाजीपाला तसेच अन्य प्रक्रिया उत्पादने घरपोच पोचवतात. या ग्रुपवर अन्य कुठल्याही पोस्ट टाकल्या जात नाहीत. दर्जेदार सेंद्रिय शेतमाल उत्पादने, भाजीपाला घरपोच मिळत असल्यामुळे अनेक ग्राहक सेंद्रिय ग्राहक मंडळ गटाल जोडले गेले आहेत.

ग्राहकांना वर्षातील बारा महिने 365 दिवस भाजीपाल्याचा पुरवठा करण्याचा करार केलेला असतो. त्यामुळे बाजारभावातील घसरणीमुळे नुकसान होत नाही. भाजीपाल्यास बारमाही 60 रुपये प्रतिकिलो याप्रमाणे दर मिळतो. शेतकरी भेंडी, गवार, चवळी, शेपू, पालक, वांगी, वाल, मेथी, कोथिंबिर, कारले, दोडके असे भाजीपाल्यामध्ये वैविध्य ठेवून वर्षभर उत्पादन घेतात. सेंद्रिय हळद पावडर, कच्ची हळद, खपली गहू, बन्सी गहू, मूग, तूर, हरभरा आदी डाळी तसेच बेसण, गूळ, पाक, तांदूळ, जिरे, घाण्याचे करडई, शेंगदाणा तेल आदी शेतमाल तसेच प्रक्रिया उत्पादनांची वसमत शहरात ग्राहकांना घरपोच विक्री केली जाते.

‘कोरोना’चा संसर्ग रोखण्यासाठी दक्षता सध्या ‘कोरोना’चा संर्सग रोखण्यासाठी संचार बंदी लागू आहे. त्यामुळे वसमत शहरातील ग्राहकांना आठवड्यातून एक दिवस भाजीपाला तसेच अन्य उत्पादने पिशव्यामध्ये भरुन पोच केली जातात. तोंडाला मास्क किंवा रुमाल बांधलेला असतो. सोबत सॅनीटायझर असते. एक दोन घरे झाले की सॅनिटायझरचे हात निर्जंतूक केले जातात. घरी आल्यानंतर परत हात निर्जंतुक केले जातात. ग्राहकांच्या घरी भाजीपाला देतांना योग्य अंतर राखले जाते. एका टोपलीमध्ये मागणी केलेला संपूर्ण भाजीपाला टाकला जातो. सध्या चलनी नोटाचा कमीकमीत वापर केला जात आहे. फोन पे, गूगल पे आदीव्दारे आॅनलाईन पेमेटवर भर आहे, असे दादाराव राऊत यांनी सांगितले.

संपर्क क्रमांक - दादाराव राऊत ः 9960686171