सातारा : परतीचा दमदार पावसाने रब्बी हंगामास पोषक वातावरण झाल्यामुळे जिल्ह्यात ८९ टक्के पेरणीची कामे उरकली आहेत. पिकांची वाढ चांगली झाल्याने हा हंगाम समाधानकारक ठरण्याची चिन्हे दिसत आहे.

सातारा जिल्ह्यातील माण, खटाव, फलटण, कोरेगाव, खंडाळा, कोरेगाव या दुष्काळी तालुक्‍याचा रब्बी हंगाम हा प्रमुख असतो. यामुळे या पाच तालुक्‍यात जास्त पेरणी होते. या हंगामाच्या सुरूवातीस परतीचा दमदार पाऊस या दुष्काळी तालुक्‍यात झाला होता. या पावसाने रब्बी हंगामास पोषक वातावरण झाल्याने पेरणीस वेळेत प्रारंभ झाला होता. यामध्ये  रब्बी ज्वारी पिकांची पेरणी अधिक झाली आहे.

जिल्ह्यात एक लाख १९ हजारावर ज्वारीचे पेरणी झाली आहे. सुरवातीचा दमदार पाऊस सध्या असलेली थंडी यामुळे ज्वारीची वाढ चांगली होत आहे. पहिल्या टप्प्यात ज्वारीची कणसे निसावू लागली आहे. पाण्याची उपलब्धतता असलेल्या शेतकऱ्यांचे ज्वारीला पाणी देण्याचे काम सुरू आहे. ज्वारीचे क्षेत्र वाढल्याने व समाधानकारक झाल्याने ज्वारीचे उत्पादन मोठ्या प्रमाणात मिळणार असा अंदाज आहे. त्याचबरोबर जनावरांना चारा मुबलक प्रमाणात उपलब्ध होणार असल्याने चारा टंचाई दूर होणार आहे.

मागील दोन वर्षांपासून रब्बी ज्वारीचे मोठ्या प्रमाणात पेरणी होत असल्याने वैरण विकास कार्यक्रम बंद करण्यात आला आहे. चाऱ्याच्या  दुष्टीने मक्‍याची लागवड सर्वसाधारण क्षेत्रापेक्षा जास्त झाली आहे. तसेच दरातील स्थिरतेमुळे हरभरा घेण्याकडे शेतकऱ्यांचा कल वाढला आहे. जिल्ह्यात २७ हजार ५०० हेक्‍टर क्षेत्रावर लागवड झाली असून सध्या हरभरा फुलोऱ्यात आला आहे. गहू पिकांची ३५ हजार हेक्‍टर क्षेत्रावर लागवड झाली आहे.

थंडीमुळे गव्हाची वाढ चांगली होत आहे. मात्र, काही भागात गहू पिकांची अपेक्षित वाढ होत नसल्याचे शेतकऱ्यांकडून सांगितले जात आहे. रब्बीतील पिकांची झालेली लागवड व समाधानकारक होत असलेली वाढ यामुळे हा हंगाम शेतकऱ्यांना फायदेशीर ठरणार आहे.