देहू, जि. पुणे : आषाढी वारीसाठी जगतगुरू संतश्रेष्ठ तुकाराम महाराज पालखी सोहळ्याने शुक्रवारी (ता. १२) दुपारी अडीच वाजण्याच्या सुमारास देहूतील देऊळवाड्यातून पंढरपूरकडे प्रस्थान ठेवले. कोरोनाच्या पार्श्वभूमीवर संत तुकाराम महाराज संस्थानने परंपरेनुसार आणि अवघ्या वीस वारकऱ्यांच्या उपस्थितीत हा सोहळा पार पाडला. यंदाच्या सोहळ्यात वारकरी, दिंड्या सहभागी नसल्या तरी वारीतील भक्तिभाव तसूभरही कमी नव्हता, अवघ्या महाराष्ट्रातील भाविकांचे लक्ष या सोहळ्याकडे लागले होते.  ॥ पंढरीची वारी - आनंद सोहळा ॥ पुण्य उभे राहो आता ।  संताच्या या कारणे । पंढरीच्या लागा वाटे ।  सखा भेटे विठ्ठल ॥ विषयाच्या आशयात आणि विकाराच्या आकारात कोंडलेल्या मानवी जिवाला मुक्त करण्याची आध्यात्मिक परंपरा म्हणजे वारी. सुख-समाधान हे प्रापंचिक ध्येय सर्व मानवजातीला गरजेचे आहे; पण विषय आणि विकारात सुखाचा शोध घेणाऱ्या जिवाला खरे सुख मिळत नाही, त्या सुखाचा ठावठिकाणा संत तुकोबाराय सांगतात, ॥ सुख पंढरिये आले ।  पुंडलिकें साठविले ॥ घ्यारे घ्यारे माझे बाप ।  जिव्हा घेऊनि खरे माप ।  करा एक खेप । मग नलगे हिंडणे ॥ पहाटेपासून काही भाविक दर्शनासाठी देऊळवाड्याकडे येत होते, मात्र देऊळवाड्याकडे येणारे मार्ग बंद होते. परंपरेनुसार पालखी प्रस्थान सोहळ्याचे पारंपरिक कार्यक्रम पहाटे चारपासून सुरू झाले. वैकुंठ गमन स्थान येथील संत तुकाराम महाराज मंदिरात अध्यक्ष मधुकर महाराज मोरे यांच्या हस्ते पूजा झाली. सहा वाजता पालखी सोहळ्याचे जनक तपोनिधी नारायण महाराज यांच्या समाधी मंदिरातील महापूजा संस्थानचे अध्यक्ष मधुकर महाराज मोरे, विश्वस्त अजित मोरे यांच्या हस्ते झाली. देऊळवाड्यातील भजनी मंडपात सकाळी दहा वाजता पुंडलिक महाराज देहूकर यांचे पालखी सोहळ्याचे कीर्तन झाले. तुझिया संगती । झाली आमची निश्चिंती ॥ या अभंगावर त्यांनी निरूपण केले.