पुणे : पावसाने उघडीप दिल्यानंतर राज्याच्या तापमानात चढ उतार होत आहे. राज्यात विदर्भ, कोकणात कमाल तापमानात सरासरीपेक्षा दोन अंशांची वाढ झाली आहे. मंगळवारी (ता. ३१) सकाळपर्यंतच्या २४ तासांमध्ये कोकण, मध्य महाराष्ट्र, विदर्भात तुरळक ठिकाणी हलक्या पावसाने हजेरी लावली, तर मराठवाड्यासह राज्याच्या बहुतांशी भागात मुख्यत: कोरडे हवामान होते. शनिवारपर्यंत (ता.४) कोकणात काही ठिकाणी, तर उर्वरित राज्यात तुरळक ठिकाणी पावसाची शक्यता वर्तविण्यात आली आहे.  राज्यात दिवसाच्या कमाल तापमानाचा पारा ३० अंशांच्या पुढे गेला आहे, तर रात्रीचे तापमानही २२ ते २७ अंशाच्या जवळपास आहे. विदर्भ, मराठवाडा आणि कोकणात तापमानात वाढ होण्याबरोबरच ढगाळ हवामान असल्याने उकाडाही वाढला आहे. चंद्रपूर येथे राज्यातील सर्वाधिक ३३.६ अंश सेल्सिअस तापमानाची नोंद झाली. मध्य महाराष्ट्रात बहुतांशी ठिकाणी तापमान सरासरीच्या आसपास आहे. विदर्भातील अकोला, ब्रह्मपुरी, चंद्रपूर, नागपूर, वर्धा येथे ३३ अंशांपेक्षा अधिक तापमानाची नोंद झाली आहे.    मध्य उत्तर प्रदेश आणि परिसरावर कमी दाबाचे क्षेत्र सक्रीय असून, या भागात तुरळक ठिकाणी जोरदार पावसाचा इशारा देण्यात आला आहे. ईशान्य भारतातील राज्यात जोरदार पावसाची शक्यता आहे. दक्षिण भारतात किनाऱ्यालगत समुद्र खवळणार असून, मासेमारीसाठी समुद्रात न जाण्याचा इशारा देण्यात आला आहे. तर महाराष्ट्रात पावसाची उघडीप राहणार असली तरी शुक्रवारपासून (ता.३) कोकणात तुरळक ठिकाणी जोरदार पावसाची शक्यता वर्तविण्यात आली आहे.   मंगळवारी (ता.३१) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे २८.९, नगर ३१.५, कोल्हापूर २६.४, महाबळेश्वर १९.३, मालेगाव ३१.०, नाशिक २८.४, सांगली २८.०, सातारा २६.६, सोलापूर ३२.३, मुंबई २९.५, अलिबाग ३०.१, रत्नागिरी २९.५, डहाणू ३२.१, आैरंगाबाद २९.४, परभणी ३२.७, नांदेड ३२.५, अकोला ३३.१, अमरावती ३१.४, बुलडाणा ३०.७, ब्रह्मपुरी ३३.२, चंद्रपूर ३३.६, गोंदिया ३१.०, नागपूर ३३.३, वर्धा ३३.२, यवतमाळ ३०.५.