पुणे: परतीच्या मार्गावर दोन दिवसापूर्वी निघालेला मॉन्सूनसाठी पुढे सरकण्यासाठी पोषकस्थिती आहे. त्यामुळे उद्या (गुरुवारी) पंजाब, राजस्थान, चंडीगड आणि दिल्ली व उत्तर प्रदेश व मध्य प्रदेश या भागातून आणखी पुढे सरकणार असल्याची माहिती हवामान विभागाच्या सूत्रांनी दिली.

देशाच्या वायव्य भागातील बाहेरच्या बाजूकडील भागात सोमवारी (ता.२८) परतीच्या प्रवासासाठी पोषक असलेली स्थिती झाली होती. त्यामुळे पंजाबच्या अमृतसर, भटिंडा, राजस्थानमधील हनुमानगड, बिकानेर, जैसलमेर या भागापर्यंत मॉन्सूनने माघार घेतली होती. त्यामुळे उत्तर भारतातील उत्तराखंड, उत्तर प्रदेश, हरियाना, चंडीगड, दिल्ली, पंजाब, हिमाचलप्रदेश, जम्मू आणि काश्मीर, राजस्थान या भागात पावसाने चांगलीच उघडीप दिली आहे.

सध्या उत्तर भारतात बिहार आणि हिमालय, पश्चिम बंगाल आणि सिक्किम परिसरात चक्राकार वाऱ्यांची स्थिती सक्रिय आहे. ही समुद्रसपाटीपासून ९०० मीटर उंचीवर आहे. तसेच दक्षिण राजस्थान व उत्तर प्रदेशाच्या ईशान्य भागातही चक्राकार वाऱ्याची स्थिती आहे. त्यामुळे परतीचा मॉन्सून झपाट्याने पुढे सरकण्याची चिन्हे आहेत. या भागातील वातावरणात वेगाने बदल होऊ लागले आहेत. परतीच्या प्रवासामुळे वाऱ्याची दिशा बदलत असल्याची स्थिती आहे. पश्चिम राजस्थानातील चुरू येथे ३९.१ अंश सेल्सिअसची सर्वाधिक कमाल तापमानाची नोंद झाली. तर महाराष्ट्रातील विदर्भात असलेल्या चंद्रपूर येथे सर्वात कमी १९.६ अंश सेल्सिअसची सर्वात कमी तापमान नोंदविले गेले.