नांदेड ः ‘‘जगाच्या तुलनेत आपल्या देशात कपाशीची उत्पादकता कमी आहे. यामुळे कपाशीच्या उत्पादनवाढीसह त्याचा उत्पादन खर्च कमी करण्याची गरज आहे,’’ असे प्रतिपादन परभणी येथील वसंतराव नाईक मराठवाडा कृषी विद्यापीठाचे कुलगुरू डॉ. अशोक ढवण यांनी केले.

नांदेड कापूस संशोधन केंद्रात शुक्रवारी (ता.२६) कृषी विद्यापीठ व कृषी विभागातर्फे राष्ट्रीय अन्न सुरक्षा अभियानांतर्गत कापूस उत्पादन वृद्धी कार्यशाळा कीटकनाशक प्रतिकारक्षमता व्यवस्थापन व प्रथमदर्शनी पीक प्रात्यक्षिक योजनेअंतर्गत निविष्ठा वाटप व शेतकरी प्रशिक्षणाचे आयोजन करण्यात आले. त्याच्या प्रारंभप्रसंगी डॉ. ढवण बोलत होते. केंद्रीय कापूस संशोधन केंद्राचे संचालक डॉ. वाय. जी. प्रसाद, संचालक संशोधन डॉ. दत्तप्रसाद वासकर, राज्याचे कृषी संचालक विकास पाटील, कृषी शास्त्रज्ञ डॉ. वेणुगोपाल, डॉ. बालसुब्रमण्यम, कृषी सहसंचालक पांडुरंग शिगेदार, जिल्हा अधीक्षक कृषी अधिकारी रविशंकर चलवदे आदी उपस्थित होते.

डॉ. धवण म्हणाले, ‘‘कापूस महाराष्ट्रातील प्रमुख पीक आहे. देशाच्या तुलनेत 33 टक्के क्षेत्रावर कपाशीची लागवड होते. उत्पादनवाढीसाठी क्षेत्र वाढ आवश्यक आहे. लागवडीपासून ते काढणीपर्यंत एकात्मिक व एकत्रित पद्धतीने संगोपन केल्यास यात वाढ होईल.’’ 

कापूस संशोधन केंद्राचे प्रमुख खीजर बेग यांनी प्रास्ताविक केले. पाटील, डॉ. प्रसाद, डॉ. वासकर यांनी शेतकऱ्यांना मार्गदर्शन केले. धनेगाव येथील कापूस संशोधन प्रक्षेत्रावर उपस्थितांनी भेट दिली. या प्रसंगी शेतकऱ्यांना निविष्ठेचे वाटप करण्यात आले. 

डॉ. ढवण यांनी ‘ॲग्रोवन’च्या विस्तार कार्यातील सहभागाबाबत गौरवपूर्ण उल्लेख केला. कृषी शास्त्रज्ञ संशोधनासोबत विस्तार कार्यही करतात. यात ‘ॲग्रोवन’ कृषी विद्यापीठाच्या हातात हात घालून काम करत आहे. प्रत्येक जिल्ह्यात ‘अग्रोवन’चा विस्तार आहे. त्यामुळे विस्ताराचे कार्य एकत्रित सुरू आहे, असे ते म्हणाले.