नागपूर : पूर्व विदर्भातील भंडारा आणि नागपूर जिल्ह्यात मध्यरात्रीपासून झालेल्या पावसाने हाहाकार उडाला. पावसामुळे अनेक गावांना जलाशयाच्या स्वरूप आले होते. नदीकाठी असलेल्या शेतातील पिकांना देखील पुराचा फटका बसला. काही ठिकाणी पीक खरडून गेल्याने शेतकऱ्यांचा संपूर्ण हंगाम वाया गेला आहे. 

बोलेरो नवीन हैदराबाद मुसळधार पावसाची शक्यता हवामान खात्याने वर्तवली होती, त्यानुसार सोमवारी (ता. २०) मध्यरात्रीपासूनच अनेक जिल्ह्यांमध्ये पावसाने जोरदार हजेरी लावली. भिवापूर तालुक्यात २४ तासांत १२४ मिलिमीटर पावसाची नोंद करण्यात आली आहे. एकाच वेळी बरसलेल्या या पावसामुळे शेतकऱ्यांचे मोठे नुकसान झाले. नांद नदीला आलेल्या पुरामुळे नदीकाठावरील चिखलापार गावात तसेच शाळेच्या मैदानात मोठ्या प्रमाणात पाणी साचले होते. तीन फुटांपेक्षा अधिक पाणी साचल्याने ग्रामस्थांच्या मनात धडकी भरली होती. गावातील अनेकांच्या घरांत पाणी शिरल्याने दैनंदिन उपयोगाच्या वस्तू भिजल्या. 

सध्या सोयाबीन हे पीक काढणीला आले असून जमिनी खरडून गेल्याने शेतकऱ्यांना आता ते काढणे शक्य नाही. कपाशीला देखील या पाण्याचा फटका बसला. शेतकऱ्यांचे कधीही न भरून निघणारे नुकसान यामुळे झाले आहे. या परिसरात कपाशी सोबतच मिरचीची लागवड मोठ्या प्रमाणावर होते या पिकांना देखील पावसाचा फटका बसला आहे.