पुणे ः अरबी समुद्राच्या पश्चिम मध्य भागात चक्रीय वाऱ्याची स्थिती आहे. त्यामुळे आज (ता.२३) आणि शनिवारी (ता.२४) कोकण व मध्य महाराष्ट्रात तुरळक ठिकाणी पाऊस पडेल. मराठवाड्यात काही प्रमाणात ढगाळ हवामान राहणार असून विदर्भात पावसाची उघडीप राहील, असा अंदाज हवामान विभागाच्या सूत्रांनी वर्तविला. 

बंगाल उपसागराच्या परिसरात असलेल्या वाऱ्याची पश्चिम मध्य भागात तीव्र कमी दाबाच्या क्षेत्रात रूपांतर झाले आहे. गुरुवारी हे क्षेत्र आणखी कमी होणार आहे. तर आज त्याची तीव्रता कमी होऊन विरून जाण्याची शक्यता आहे. त्यामुळे राज्यातील अनेक भागात उघडीप राहील. त्यामुळे राज्यात ऑक्टोबर हीट वाढणार असून कमाल तापमानाचा पारा वाढणार आहे. खानदेशासह उत्तर महाराष्ट्रात पावसाचा पाऊस कमी झाला आहे. त्यामुळे या भागातून केव्हाही परतीचा मॉन्सून माघार घेण्याची शक्यता आहे. 

कोकण व मध्य महाराष्ट्रातील काही भागांत विजांच्या कडकडाटासह पाऊस पडेल. कोकणातील ठाणे, रायगड, रत्नागिरी, सिंधुदुर्ग व मध्य महाराष्ट्रातील नाशिक, नगर, पुणे, कोल्हापूर, सातारा, सांगली व खानदेशातील धुळे जिल्हयात तुरळक ठिकाणी जोरदार पाऊस पडेल. शनिवारी रायगड, रत्नागिरी, सिंधुदुर्ग, नाशिक, पुणे, कोल्हापूर, सातारा जिल्ह्यातही काही ठिकाणी जोरदार पाऊस पडण्याची शक्यता आहे.