कोल्हापूर : जिल्ह्यात गुरुवारी (ता. २८) दुपारपर्यंत पावसाचा जोर कमी झाला होता. मात्र, दुपारी चारनंतर विशेषतः पश्‍चिम भागात पुन्हा पावसाला सुरवात झाली. तर पावसाचा जोर ओसरला असला तरी नद्यांच्या पाणीपात्रात वाढ कायम आहे. अद्यापही अकरा बंधारे पाण्याखाली असल्याची माहिती पाटबंधारे विभागाच्या सूत्रांनी दिली.

गगनबावडा तालुक्‍यात सर्वाधिक ४७ मि.मी. पावसाची नोंद झाली असून, जिल्ह्यात सरासरी १३.५६ टक्के पाऊस झाला आहे. पंचगंगा नदीवरील शिंगणापूर, राजाराम, सुर्वे, रुई, इचलकरंजी, तेरवाड व शिरोळ हे सात बंधारे पाण्याखाली आहेत. भोगावती नदीवरील हळदी, खडक कोगे व सरकारी कोगे हे तीन बंधारे पाण्याखाली आहेत. तर कासारी नदीवरील यवलूज हा एक बंधारा पाण्याखाली गेला आहे.

पाटंबधारे विभागाच्या गुरुवारी सकाळच्या नोंदीप्रमाणे कोल्हापुरातील राजाराम बंधाऱ्यावरील पाणीपातळी २३ फूट ५ इंच, सुर्वे २२ फूट ६ इंच, रुई ५२ फूट, इचलकरंजी ४८ फूट, तेरवाड ४३ फूट, शिरोळ ३३ फूट, नृसिंहवाडी २४ फूट. इतकी होती. पश्‍चिमेकडील काही तालुक्यात धरणक्षेत्रात थांबून थांबून चांगल्या सरी सुरू असल्याने धरणातील गुरुवारी (ता. २८) सकाळी आठ वाजेपर्यंतचा विविध प्रकल्पांतील पाणीसाठा याप्रमाणे ः राधानगरी - २.५४ (८.३६१), तुळशी १.६४ (३.४७१), वारणा १५.२० (३४.३९९), दूधगंगा ७.८० (२५.३९३), कासारी ०.८३ (२.७७४), कडवी १.३७ (२.५१५), कुंभी १.२१ (२.७१३), पाटगाव १.४१ (३.७१६), चिकोत्रा ०.१९ (१.५२२), चित्री ०.५० (१.८८६ ), जंगमहट्टी ०.३९ (१.२०८), घटप्रभा १.५५ (१.५४५), जांबरे ०.३४ (०.८२० टीएमसी) आणि कोदे ल. पा. ०.१३ (०.२१४).