सातारा  ः जिल्ह्याच्या पश्‍चिमेकडील महाबळेश्वर, पाटण, जावळी, सातारा या तालुक्‍यात संततधार पाऊस झाला असून, अधूनमधून पावसाच्या दमदार सरी कोसळत आहेत. यामुळे शेतात पाणी साचून राहत आहे. जिल्ह्यात शुक्रवारी (ता. १३) सकाळी आठ वाजेपर्यंत सरासरी ३२.७७ मि.मी. पावसाची नोंद झाली आहे.

महाबळेश्वर, पाटण, जावळी, सातारा या चार तालुक्‍यांत पावसाचे प्रमाण जास्त आहे. या तालुक्‍यातील अनेक ठिकाणी जोरदार सरी कोसळत आहेत. या चारही तालुक्‍यात सरासरी ४० मि.मी.पेक्षा जास्त पाऊस झाला आहे. यामुळे भात लागवडी व्यतिरिक्‍त शेतातील बहुतांशी कामे बंद आहेत. गुरुवारी रात्रीही काही ठिकाणी जोरदार पाऊस झाला आहे. कराड, कोरेगाव, खटाव व वाई तालुक्‍यात हलका ते मध्यम स्वरूपाचा पाऊस झाला आहे.

माण, खंडाळा या तालुक्‍यात अल्प प्रमाणात पाऊस सुरू आहे. मात्र फलटण तालुक्‍यात पावसाची वक्रदृष्टी असून या तालुक्‍यात पावसाअभावी पिके धोक्‍यात येऊ लागली आहेत. पाटण, कराड  तालुक्‍यात भात लागवडीस वेग येऊ लागला आहे. पावसाच्या आगमनामुळे पिकांची जोमदार वाढ सुरू झाली आहे.