नांदेड ः नांदेड जिल्ह्यात बुधवार (ता. ११) पर्यंत एकूण १ लाख ४३ हजार ९३४ हेक्टरवर (१०५.३० टक्के) पेरणी झाली आहे. जिल्ह्यातील रब्बीच्या पेरणी क्षेत्राने सर्वसाधारण क्षेत्राचा टप्पा पार केला आहे. आजवर हरभऱ्याची दुपटीच्या जवळपास, ज्वारीची निम्म्याहून अधिक क्षेत्रावर पेरणी झाली आहे. अद्याप गहू, करडईचे क्षेत्र २५ टक्क्यांच्या आतच आहे, असे कृषी विभागाच्या सूत्रांनी सांगितले.

सिंचनासाठी पाणी उपलब्ध असल्यामुळे यंदा रब्बीच्या क्षेत्रात वाढ झाली आहे. गतवर्षी प्रमाणेच यंदाही शेतकऱ्यांनी हरभऱ्याला सर्वाधिक पसंती दिली आहे. जिल्ह्यात रब्बीचे सर्वसाधारण क्षेत्र १ लाख ३६ हजार ७१२ हेक्टर आहे. यामध्ये रब्बीचे ज्वारीचे सर्वसाधारण क्षेत्र २६ हजार ९७५ हेक्टर, गव्हाचे ३८ हजार ५३८ हेक्टर, मक्याचे ३ हजार १७६ हेक्टर, हरभऱ्याचे ६२ हजार ३५९ हेक्टर, करडईचे ४ हजार ७६८ हेक्टर क्षेत्राचा समावेश आहे. बुधवार (ता. ११) पर्यंत जिल्ह्यातील सर्व १६ तालुक्यांमध्ये मिळून एकूण १ लाख ४३ हजार ९६४ हेक्टरवर (१०५.३० टक्के) पेरणी झाली आहे.

अर्धापूर, हदगाव, माहूर, किनवट, उमरी, धर्माबाद, बिलोली, देगलूर या ८ तालुक्यांतील रब्बीचे पेरणी क्षेत्र सर्वसाधारण क्षेत्रापेक्षा अधिक आहे. नांदेड, मुदखेड, हदगाव, हिमायतनगर, भोकर, नायगाव, मुखेड, कंधार, लोहा या ९ तालुक्यांत १५.२७ ते ७४.२९ टक्के क्षेत्रावर पेरणी झाली आहे. मुखेड तालुक्यातील पेरणीची टक्केवारी सर्वांत कमी आहे.