हिंगोली : शासकीय खरेदी केंद्रांवर कापूस विक्रीसाठी जिल्ह्यातील तीन कृषी उत्पन्न बाजार समित्यांमध्ये १ हजार ८२६ शेतकऱ्यांनी ४४ हजार २२७ क्विंटल कापूस विक्रीसाठी नोंदणी केली आहे. त्यापैकी बुधवार (ता.६) पर्यंत एका खरेदी केंद्रांवर ५९ शेतकऱ्यांचा १ हजार १७९.८५ क्विंटल कापूस खरेदी करण्यात आला, अशी माहिती सूत्रांनी दिली.  

भारतीय कापूस महामंडळ (सीसीआय) आणि राज्य सहकारी कापूस उत्पादक महासंघ (फेडरेशन) च्या जिल्ह्यातील हिंगोली, जवळा बाजार (ता.औंढानागनाथ), वसमत (हयातनगर) येथील केंद्रावर शेतकऱ्यांना नोंदणीसाठी मंगळवार (ता.५) पर्यंतची मुदत देण्यात आली होती. विहित कालावधीत हिंगोली येथील बाजार समितींतर्गंत खरेदी केंद्रावर एकूण १२९ शेतकऱ्यांनी ३ हजार ८०० क्विंटल कापूस विक्रीसाठी, जवळा बाजार कृषी उत्पन्न बाजार समितीकडे १ हजार २०२ शेतकऱ्यांनी ३० हजार १७२ क्विंटल कापूस विक्रीसाठी आणि वसमत कृषी उत्पन्न बाजार समितीकडे ४९५ शेतकऱ्यांनी १० हजार २५५ क्विंटल कापसाच्या विक्रीसाठी नोंदणी केली. 

जवळा बाजार कृषी उत्पन्न बाजार समितीतंर्गंत भारतीय कापूस महामंडळाच्या मार्डी येथील खरेदी केंद्रावर बुधवार (ता.६) पर्यंत एकूण ५९ शेतकऱ्यांचा १ हजार १७९.८५ क्विंटल कापूस खरेदी करण्यात आला. अन्य दोन ठिकाणच्या केंद्राअंतर्गंतचे शेतकरी कापूस खरेदी सुरु होण्याच्या प्रतिक्षेत आहेत.