पुणे  ः केंद्र आणि राज्य सरकारचा प्राधान्यक्रम असलेल्या आॅनलाइन राष्ट्रीय कृषी बाजार (ई-नाम)च्या अंमलबजावणीबाबत केंद्रीय सचिवांनी कान टोचल्यानंतर पुणे बाजार समितीमध्ये डाळिंबाचे आॅनलाइन लिलाव सुरू करण्याची धावपळ सुरू झाली आहे. यासाठी शेतकऱ्यांना वेठीस धरण्याचा प्रकार समोर येत असून, आॅनलाइन लिलावांमध्ये सहभागी होणार असाल तरच डाळिंब बाजारात आणा असा फतवाच बाजार समिती प्रशासनाने काढल्याने शेतकरी संतप्त झाले आहेत. शेतकऱ्यांच्या खांद्यावर बंदूक ठेवून अडतेच ई- नामला विरोध करीत असल्याचेदेखील समोर येत आहे. 

दरम्यान, आॅनलाइन डाळिंब लिलाव प्रक्रियेची पाहणी करण्यासाठी केंद्रीय पथक आज (सोमवार) आणि उद्या (मंगळवारी) पुणे बाजार समितीला भेट देणार आहे. यामुळे बाजार समितीने काही प्रमाणात डाळिंबाचे आॅनलाइन लिलाव सुरू केले आहेत. सोमवारी आणि मंगळवारी केंद्रीय समितीच्या दौऱ्यादरम्यान आवक जास्त होऊन, लिलाव प्रक्रियेमध्ये गोंधळ निर्माण होऊ नये म्हणूनच शेतकऱ्यांना आॅनलाइन लिलावात सहभागी होणार नसाल तर शेतीमाल आणू नये असे सांगण्यात आल्याचीदेखील चर्चा बाजार समितीत आहे. 

राज्यातील ई-नामच्या अंमलबजावणीचा आढावा नुकताच केंद्रीय सचिवांनी पणन मंडळात झालेल्या बैठकीत घेतला. या वेळी पुणे आणि मुंबई बाजार समितीमधील ई-नामच्या अंमलबजावणीबाबत नाराजी व्यक्त केली होती. या पार्श्‍वभूमीवर केंद्रीय पथक सोमवारी (ता. ९) बाजार समितीमध्ये येत आहे. या समितीसमोर आॅनलाइन लिलावाचे प्रात्यक्षिक होणार आहे. या वेळी शेतकऱ्यांनी गोंधळ घालू नये यासाठी आॅनलाइन लिलाव करणार असाल तरच डाळिंब आणण्याचे फर्मान बाजार समितीने अडत्यांमार्फत शेतकऱ्यांना केले आहे.