लिंगदेव, जि. नगर : मुळा नदीवरील पिंपळगाव खांड (ता. अकोले) धरणातून ५०० क्‍युसेकने पिण्यासाठी आवर्तन सोडण्यात आले. आवर्तन सोडताना धरणात ५४३ दशलक्ष घनफूट पाणीसाठा होता. हे आवर्तन १५ दिवस चालणार आहे. आवर्तनात ३५० दशलक्ष घनफूट पाणी सोडण्यात येणार आहे. 

जास्तीत जास्त गावांपर्यंत पाणी पोचवायचे असल्याने आवर्तनात कोणताही अडथळा आणू नये; अन्यथा संबंधितांवर कायदेशीर कारवाई केली जाणार आहे. प्रतिबंधात्मक उपाय म्हणून प्रांताधिकाऱ्यांनी पिंपळगाव खांड धरण ते मांडव्यापर्यंत जमावबंदी आदेश लागू केला आहे. 

आवर्तन संपेपर्यंत हा आदेश लागू असेल. आवर्तनास अडथळा येऊ नये, यासाठी मुळा नदीकाठी पोलिस बंदोबस्त असेल. शिवाय आवर्तन काळात २१ तासांचे भारनियमन केले जाण्याची शक्‍यता आहे. लाभक्षेत्रातील सुमारे २२ गावांना या आवर्तनातून पिण्यासाठी पाणी मिळणार आहे.