नवी दिल्ली : केंद्र सरकारच्या कृषी कायद्यांविरोधात राजधानीच्या सीमांवर सुरू असलेल्या आंदोलनस्थळी बुधवारी (ता.१३) शेतकऱ्यांनी लाहोरी सणाचे निमित्त साधत कायद्यांची होळी केली. सिंघू, गाझीपूर, टिकरी सीमांसह उत्तर भारतातील पंजाब, हरियाना, हिमाचल, उत्तर प्रदेशात अनेक भागात शेतकऱ्यांनी केंद्र सरकारच्या भूमिकेचा निषेध केला. केंद्र सरकारच्या तीन कृषी कायद्यांच्या विरोधात आणि हमीभावासाठीच्या कायद्याकरिता शेतकरी दिल्लीच्या सीमांवर ४९ दिवसांपासून आंदोलन करत आहेत. पंजाबात आंदोलनामुळे रेल्वे सेवेवर परिणाम झाला. अनेक गाड्या रद्द केल्या, तर काहींचे मार्ग बदलण्यात आले. आतापर्यंत ८ चर्चांच्या फेऱ्या झाल्या असून १५ जानेवारीस नववी फेरी आहे. केंद्रीय कृषी राज्यमंत्री पुरुषोत्तम रूपाला यांनी केंद्र सरकार चर्चा सुरू ठेवण्याबाबत  सकारात्मक असल्याचे म्हटले आहे.