नगर ः राज्यात अतिवृष्टीमुळे कांदा उत्पादक शेतकऱ्यांचे मोठे नुकसान झाले. त्यामुळे कांद्याला चांगला दर मिळणे गरजेचे आहे. त्यामुळे केंद्र सरकारने कांदा निर्यातीला प्रोत्साहन मिळावे, यासाठी अनुदान द्यावे. त्यासाठी पुढाकार घ्यावा, याबाबत पारनेर कृषी उत्पन्न बाजार समितीचे सभापती प्रशांत गायकवाड यांनी राष्ट्रवादी काँग्रेसचे अध्यक्ष शरद पवार यांच्याकडे निवेदन दिले.  

निवेदनानुसार, राज्यात झालेल्या अतिवृष्टीने कांदा पिकाचे नुकसान झाले. जो कांदा आला, त्याला भाव मिळाला नाही. त्यामुळे शेतकरी अडचणीत सापडले आहेत. त्यामुळे कांद्याला चांगला दर मिळणे गरजेचे आहे. कांद्याची निर्यात झाली तरच चांगला दर मिळेल. राज्यातील रब्बी हंगामातील कांदा लागवड गतवर्षीच्या तुलनेत दोन लाख हेक्‍टरने वाढून चार लाख हेक्‍टरपर्यंत गेली आहे. त्यामुळे रब्बी हंगामात कांद्याचे उत्पादन मोठ्या प्रमाणात वाढले. त्यामुळे  कांद्याचे दर १५ ते १८ रुपयांवर आले आहेत. ते अजूनही घसरण्याची शक्‍यता आहे. 

निर्यातीसाठी कंटेनरचे भाडे वाढले आहे. त्यासाठी निर्यातीला अनुदान दिले, तर शेतकऱ्यांना चांगला भाव मिळू शकतो, त्यासाठी स्वतः पुढाकार घेऊन कांदा  निर्यातीला प्रोत्साहन अनुदान  मिळवून द्यावे, असे गायकवाड यांनी निवेदनात म्हटले आहे. 

पवार पुढाकार घेणार

दरम्यान, मंगळवारी (ता.१६) दिल्लीत वाणिज्यमंत्री पीयूष गोयल यांच्याशी चर्चा करणार आहे. कांद्याला निर्यात अनुदान मिळावे, यासाठी स्वतः पुढाकार घेणार असल्याचे पवार यांनी सांगितले आहे.