नांदेड : नांदेड, परभणी, हिंगोली जिल्ह्यांत मृग नक्षत्रात पावसाने दमदार सुरवात केली. परंतु गेल्या आठवडाभरापासून पावसाने दडी मारली आहे. त्यामुळे खरिपाची पेरणी लांबणीवर पडली आहे. पावसाअभावी सुरवातीला केलेली पेरणी वाया जाण्याची चिन्हे दिसत आहेत. उघडिपीचा कालावधी वाढत असल्यामुळे दुबार पेरणीचे सावट गडद अधिक होत आहे. दुबार पेरणीमुळे खर्च वाढणार असल्यामुळे शेतकरी चिंतित झाले आहेत.

यंदा एक ते १५ जून या कालावधीत नांदेड जिल्ह्यामध्ये १७३.५६, परभणी जिल्ह्यात १११.३५, हिंगोली जिल्ह्यात ११६.०७ मिमी पाऊस झाला आहे. हा पाऊस आजवर अपेक्षित पावसाच्या सरासरीपेक्षा अधिक आहे. मृग नक्षत्राची सुरवात दमदार पावसाने झाली. पुढेही असाच सुरू राहील या अपेक्षेने उपलब्ध ओलाव्यावर अनेक शेतकऱ्यांनी कापूस लागवड केली.

काही तालुक्यातील शेतकऱ्यांनी सोयाबीन, मूग या पिकांची पेरणीदेखील केली. हळद लागवडदेखील करण्यात आली. परंतु, गेल्या आठवडाभरात काही ठिकाणी झालेल्या तुरळक पावसाचा अपवाद वगळता बहुतांश भागात पावसाने दडी मारलेली आहे. आणखीन काही दिवस पावसाची शक्यता नाही. त्यामुळे शेतकऱ्यांनी पेरण्या थांबविल्या आहेत.

जूनच्या पहिल्या दहा दिवसांत जोरदार पाऊस झाल्यामुळे यंदा वेळेवर पेरण्या होण्याची शक्यता दिसू लागली होती. परंतु, त्यानंतर पावसाने उघडीप दिल्यामुळे आता पेरणी लांबणीवर पडली आहे. संरक्षित सिंचनाची सुविधा असेले शेतकरी नुकत्यात उगवू लागलेल्या कपाशी, हळद आदी पिकांना ताण बसू नये म्हणून पाणी देत आहेत. परंतु कोरडवाहू क्षेत्रातील नुकतीच उगवू लागलेली पिके सुकून जात आहेत. लवकर पाऊस नाही आला तर पहिली पेरणी वाया जाणार असून दुबार पेरणी करावी लागणार आहे. खर्च वाढणार असल्यामुळे शेतकरी चिंतित झाले आहेत.