परभणी : लॅाकडाऊनमुळे राज्य कापूस उत्पादक सहकारी पणन महासंघ (फेडरेशन), भारतीय कापूस महामंडळ (सीसीआय) आणि खासगी व्यापाऱ्यांकडून कापूस खरेदी बंद आहे. उन्हाचा चटका वाढत आहे. त्यामुळे दर वाढतील या अपेक्षेने घरात कापूस साठवून ठेवलेल्या शेतकऱ्यांची चिंता वाढली आहे. कापूस खरेदी सुरु होण्याच्या हालचाली दिसत नसल्यामुळे त्यांच्या अडचणी वाढल्या आहेत. तत्काळ ही खरेदी सुरु करण्याची मागणी शेतकऱ्यांनी केली.

शुक्रवार (ता.२० मार्च) पर्यंत जिलह्यात १९ लाख ६१ हजार १४० क्विंटल कापसाची खरेदी करण्यात आली. त्यात पणन महासंघाची ४ लाख ७८ हजार ६६५ क्विंटल, सीसीआयची ८ लाख ८८ हजार ४९२ क्विंटल, तर खासगी व्यापाऱ्यांच्या ५ लाख ९३ हजार ९८३ क्विंटल कापूस खरेदीचा समावेश आहे. रुईच्या गाठी तसेच सरकी साठविण्यासाठी जागा नसल्यामुळे महासंघाच्या कापूस खरेदीत अडथळे येत गेले. खुल्या बाजारातील दरात घसरण झाल्यामुळे पणन महासंघ आणि सीसीआयच्या खरेदी केंद्रांवर वाहनांच्या रांगा लागल्या होत्या. मोजमापास विलंब होत असल्याने वाहन भाड्याचा भुर्दंड शेतकऱ्यांना बसला. 

खासगी खरेदी देखील गेल्या पंधराहून अधिक दिवसांपासून बंद आहे. अनेक शेतकऱ्यांनी दरात सुधारणा होऊन फायदा होईल, या अपेक्षेने घरांमध्ये मोठ्या प्रमाणावर कापूस साठवून ठेवलेला आहे. परंतु, आता तापमानात वाढ झाल्यामुळे ते धोकादायक झाले आहे. पणन महासंघ आणि सीसीआयकडून कापूस सुरु करण्याबाबत हालचाली दिसत नाहीत. खासगी कापूस विक्री सुरु झाली नाही.    साडेतीन हजार शेतकऱ्यांची नोंदणी 

पणन महासंघाच्या खरेदी केंद्रांवर कापूस विक्री करण्यासाठी नोंदणी करावी लागत आहे. परभणी बाजार समितीच्या कार्यक्षेत्रातील १२५ गावांतील शेतकऱ्यांची नोंदणी तीन दिवस सुरु होती. त्यावेळी सुमारे साडेतीन हजारांवर शेतकऱ्यांनी नोंदणी केली. लॅाकडाऊनमुळे नोंदणी बंद आहे. अन्य ठिकाणच्या बाजार समित्यात नोंदणी सुरु नाही.