सातारा ः जिल्ह्यात सोमवारी सर्वदूर पावसाने हजेरी लावली आहे. काही ठिकाणी वादळी वाऱ्यामुळे पिके आडवी झाल्याने नुकसान झाले आहे. जिल्ह्यात सरासरी ४.२४ मिलिमीटर पावसाची नोंद झाली आहे. खरिपाच्या तोंडावर सलग दुसऱ्या दिवशी पावसाने हजेरी लावल्याने पेरणीपूर्व कामांना गती येणार आहे.

जिल्ह्यात सोमवारी सकाळपासूनत ढगाळ वातावरण झाले होते. काही ठिकाणी अधुनमधून हलक्या सरी येत होत्या. त्यानंतर सायंकाळी वादळी वाऱ्यासह पावसाने सुरुवात केली. कऱ्हाड तालुक्यात सलग दुसऱ्या दिवशी दमदार पाऊस झाला आहे. वादळी वाऱ्यासह झालेल्या पावसामुळे अनेक घराचे तसेच पिकांचे नुकसान झाले आहे. या तालुक्यात २४ तासांत २५.५४ मिलीमीटर पाऊस झाला आहे. अनेक शेतात पाणी साचले आहे.

तसेच सातारा, जावळी, पाटण, खटाव, माण, महाबळेश्वर याही तालुक्यांत काही ठिकाणी दमदार पाऊस झाला आहे. माण, खटाव या दुष्काळी तालुक्यात पाऊस झाल्याने टंचाई कमी होण्यास मदत होणार आहे. कोरेगाव, फलटण, खंडाळा, वाई या तालुक्यात हलका ते मध्यम स्वरूपाचा पाऊस झाला. वादळी वाऱ्यामुळे उभ्या पिकांचे नुकसान झाले असलेतरी खरिपाच्या दृष्टीने हा पाऊस फायदेशीर ठरणार आहे. ऊस, आले लागवडीसह पेरणीपूर्व कामांना गती येणार आहे.

तालुकानिहाय पाऊस मिलिमीटरमध्ये सातारा-११.०६, जावली-९.५३, पाटण-९.५५, कऱ्हाड- २५.५४, कोरेगाव-६.३३, खटाव-१०.२९, माण-१३.१४, फलटण-४.००, खंडाळा-१.७५, वाई-४.००, महाबळेश्वर-१३.२५