पुणे : राज्यात मंगळवारपासून बहुतांशी ठिकाणी कोरड्या हवामानाचा अंदाज अाहे. आकाशही मुख्यत: निरभ्र राहणाार असल्याने राज्याच्या तापमानात वाढ होण्याची शक्यता हवामान विभागाने वर्तविली आहे. तर मंगळवारी मध्य महाराष्ट्रात तर बुधवारी विदर्भात तुरळक ठिकाणी पावसाची अंदाज वर्तविण्यात आला आहे.  मागील अाठवड्यात राज्यात ढगाळ हवामानासह अवकाळी पावसाने हजेरी लावली. दोन, ते तीन दिवस पूर्णपणे ढगाळ हवामान असल्याने राज्याच्या कमाल तापमानात मोठी घट झाली होती. अनेक ठिकाणी तापमानात सरासरीपेक्षा ५ ते १२ अंशांपेक्षा अधिक घट होत थंड दिवस अनुभवायला मिळाले. त्यानंतर शनिवारपासून तापमानात पुन्हा वाढ होऊ लागली आहे. सोमवारी सकाळपर्यंतच्या २४ तासांमध्ये भिरा येथे राज्यातील उंच्चांकी ३९.५ अंश सेल्सिअस तापमानाची नोंद झाली. रविवारी (ता. १८) दुपारनंतर मध्य महाराष्ट्रातील, नाशिक, नगर, पुणे, सातारा, कोल्हापूर जिल्ह्यात पावसाच्या हलक्या सरी पडल्या. सोमवारी उत्तर मध्य महाराष्ट्रात समुद्र सपाटीपासून १.५ किलोमीटर उंचीवर चक्राकार स्थिती होती. या स्थितीपासून मध्य राज्यस्थानपर्यंत हवेचा कमी दाबाचा पट्टा होता. तर पश्‍चिम किनाऱ्यावर पूर्व-मध्य अरबी समुद्रापासून केरळपर्यंत आणखी एक हवेच्या कमी दाबाचा पट्टा सक्रिय होता. यामुळे मध्य महाराष्ट्रात मंगळवारी आणि तर विदर्भात बुधवारी तुरळक पावसाचा अंदाज अाहे. तर कोकण, मराठवाड्यात हवामान कोरडे राहणार आहे. सामवारी (ता. १९) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३३.७, जळगाव ३७.६, कोल्हापूर ३२.४, महाबळेश्वर २८.३, मालेगाव ३७.०, नाशिक ३४.९, सांगली ३५.०, सातारा ३४.३, सोलापूर ३६.५, मुंबई ३१.०, अलिबाग ३०.१, डहाणू ३१.६, भिरा ३९.५, औरंगाबाद ३५.४, परभणी ३७.४, नांदेड ३७.०, अकोला ३८.०, अमरावती ३५.६, बुलडाणा ३६.०, ब्रह्मपुरी ३७.०, चंद्रपूर ३६.०, गोंदिया ३५.२, नागपूर ३५.६, वर्धा ३६.५, यवतमाळ ३५.०.