आटपाडी, जि. सांगली : पावणे दोन वर्षांत येथील तालुका कृषी विभागाने ‘रोहयो’तून एकाही डाळिंब लागवडीला मंजुरी दिलेली नाही. तर, दुसरीकडे नेतेमंडळींना पोसण्यासाठीच ‘रोहयो’ची कामे दिली आहेत. त्यामुळे कृषीच्या कामावर प्रश्न निर्माण झाला आहे. 

महसूल विभाग ‘रोहयो’तून डाळिंब लागवडीला मंजुरी देत होते. तसेच मजुरांचे मस्टर आणि इतर बिलेही काढली जात होती. दोन वर्षांपूर्वी ही कामे कृषीकडे सोपवली आणि ‘रोहयो’तून डाळिंब लागवडीला ब्रेक लागला. तालुक्‍यात नेहमीच डाळिंब लागवड सुरू असते. 

पाच एकरांतील शेतकरी ‘रोहयो’तून डाळिंब लागवडीला पसंती देतात. तेथे अनुदान जादा मिळते. लागवडीसाठी अनेकांनी कृषीकडे प्रस्ताव सादर केले. काहींना मंजुरीही दिली. मात्र अधिकारी बदलले आणि कामकाजाची पद्धतही बदलली. योजनाच गुंडाळून ठेवली आणी दुसरीच योजना माथी मारली. तेथे अनुदान कमी मिळते.

पावणे दोन वर्षांत एकही मंजुरी ‘रोहयो’तून दिली नाही. उलट पूर्वीची मंजूर कामे बंद केली. रोहयोत गैरव्यवहार होतात. बोगस मजूर दाखवले जातात, अशी कारणे सांगून अधिकाऱ्यांनी टाळाटाळ केली. डाळिंबांची ओळख असलेल्या तालुक्‍यातच ही स्थिती ओढवली. त्यामुळे शेतकऱ्यांमध्ये तीव्र नाराजी आहे. 

शेतकऱ्यांना डावलून इतरांना पोसले 

कृषी विभागाने शेतकऱ्यांना डाळिंब लागवडीला मंजुरी दिली नाही. दुसरीकडे मात्र काही नेते मंडळी आणि कार्यकर्त्यांना औषधी वनस्पती रोपवाटिका आणि इतर कामे दिली आहेत. तेथील गैरव्यवहाराला ते पाठीशी घालतात, असे शेतकऱ्यांचे मत आहे. शेतकऱ्यांवर अन्याय करून नेते मंडळींचे भले करण्याचे काम कृषी विभाग करत आहे, असा शेतकऱ्यांचा आक्षेप आहे.