मंचर, जि. पुणे : आंबेगाव तालुक्यातील अनेक गावांमध्ये आज (ता. २८) भाद्रपद बैलपोळा साजरा होत आहे. त्या निमित्ताने मंचर, तळेघर येथे बैलांच्या सजावटीसाठी लागणारे साहित्य खरेदी करण्यासाठी शेतकऱ्यांनी बाजारपेठेत गर्दी केली होती. 

मंचर येथील छत्रपती शिवाजी महाराज चौकात शनिवारी मंचर, शेवाळवाडी, निघोटवाडी या तीन गावांच्या वतीने बैलपोळा महोत्सवाचे आयोजन करण्यात आले आहे. उत्कृष्ट सजावट केलेल्या बैलजोड्यांच्या मालकांना मानचिन्ह देऊन सन्मानित करण्यात येणार आहे. कलगीतुरा व सांस्कृतिक कार्यक्रमांचेही या वेळी आयोजन करण्यात आले आहे. 

या वर्षी समाधानकारक पाऊस झाल्याने आपल्या ढवळ्या-पवळ्याला सजविण्यासाठी झूल, रंगीबिरंगी गोंडे, घंट्यांच्या माळा आदी साहित्य खरेदीसाठी शेतकऱ्यांनी बाजारात गर्दी केली होती. तसेच शहरात राहणाऱ्या नागरिकांकडून मातीची बैलजोडी खरेदी करण्यासाठी लगबग सुरू होती. २५ रुपयांपासून ते २०० रुपयांपर्यंत मातीच्या बैलांच्या किमती होत्या. भीमाशंकर परिसरातील तीस आदिवासी गावांतील शेतकरी तळेघर येथील बाजारात बैल सजावटीचे साहित्य खरेदी करण्यासाठी आले होते.