अकोला  : गत हंगामात बोंड अळीचा प्रादुर्भाव झाल्यामुळे कापूस पिकाचे मोठ्या प्रमाणात नुकसान झाले होते. बोंड अळी नियंत्रणासाठी कपाशीच्या शेतात फेरोमोन ट्रॅप लावल्यास मोठा फायदा होतो. बोंड अळीच्या नियंत्रणासाठी शेतकऱ्यांनी शेतात तातडीने फेरोमोन ट्रॅप लावावेत, असे आवाहन जिल्हाधिकारी आस्तिक कुमार पाण्डेय यांनी केले.

महसूल प्रशासनातर्फे एक अाॅगस्ट हा फेरोमोन डे साजरा करण्यात अाला. या वेळी श्री. पांडेय यांनी तालुक्यातील कापशी येथे विष्णू वडतकर यांच्या कपाशीच्या शेतात जात शेतकऱ्यांशी संवाद साधला. या वेळी उपविभागीय अधिकारी संजय खडसे, तहसीलदार विजय लोखंडे, तालुका कृषी अधिकारी नरेंद्र शास्त्री, सरपंच अंबादास उमाळे यांच्यासह शेतकरी उपस्थित होते.

या वेळी जिल्हाधिकारी पाण्डेय म्हणाले, की बोंड अळीचा प्रादुर्भाव होण्यापूर्वी उपाययोजना म्हणून फेरोमोन ट्रॅपचा वापर करावा. बोंड अळीचा प्रादुर्भाव शेतात दिसून आल्यास कृषी विभाग, तसेच कृषी विद्यापीठातील तज्ज्ञांच्या सल्ल्यानुसार कीडनाशकाची फवारणी करावी. कृषी सहायकांनी शेतात जाऊन फेरोमोन ट्रॅप बसविण्याची कार्यवाही येत्या दोन-तीन दिवसांत पूर्ण करावी.

या वेळी अधिकारी कपाशीच्या शेतालगत सोयाबीन पिकाची पाहणी करण्यासाठी गेले. या ठिकाणी सोयाबीनवर चक्रीभुंगा तसेच स्पोडोप्टेरा अळीचा प्रादुर्भाव दिसून अाला. या ठिकाणी तालुका कृषी अधिकारी नरेंद्र शास्त्री यांनी शेतकऱ्यांना कीड निर्मूलनाबाबत उपाययोजनेविषयी मार्गदर्शन केले.