परभणी/ औरंगाबाद :  दि परभणी जिल्हा मध्यवर्ती सहकारी बॅंक संचालक मंडळाच्या १४ जागांसाठी परभणी, हिंगोली जिल्ह्यातील १४ केंद्रांवर आज, रविवारी (ता.२१)  सकाळी ८ ते सायंकाळी ५ या कालावधीत मतदान होणार आहे. मतमोजणी मंगळवारी (ता.२३)  परभणी येथे होईल. औरंगाबाद जिल्हा बॅंकेसाठीही आज (ता. २१) मतदान होणार असून, २२ मार्चला होणार मतमोजणी होईल. 

परभणी, हिंगोली हे दोन जिल्हे कार्यक्षेत्र असलेल्या परभणी जिल्हा मध्यवर्ती सहकारी बॅंकेच्या २१ संचालक मंडळाच्या निवडणुकीत ७ जागांवर बिनविरोध निवड झाली आहे. त्यामुळे आता १४ जागांसाठी ३० उमेदवार निवडणूक रिंगणात आहेत. एकूण १ हजार ५७० मतदार मतदानाचा हक्क बजावणार आहेत. मंगळवारी (ता.२३)  सकाळी आठ वाजता परभणी येथील कल्याण मंडळ येथे मतमोजणी होईल. 

दरम्यान, औरंगाबाद जिल्हा बॅंकेच्या १८ जागांसाठी आज (ता. २१) मतदान होत आहे. वैयक्तिक सभासद मतदारसंघातून अर्जच आला नाही. त्यामुळे २१ पैकी दोन जागा आधीच बिनविरोध झाल्या आहेत. १८ जागांसाठीच ही निवडणूक होत आहे. एकूण ४८ उमेदवार निवडणुकीच्या रिंगणात आहेत. या निवडणुकीसाठी १ हजार ११४ मतदार आपल्या मतदानाचा हक्‍क बजावणार आहेत. १० केंद्रांत सकाळी ८ ते दुपारी ४ वाजेदरम्यान मतदार मतदान करतील. सोमवारी (ता. २२) मतमोजणी होईल. कोरोनाच्या पाश्वभूमीवर  विशेष खबरदारी घोईन मतदानाची सर्व प्रक्रिया पार पडणार आहे.