नंदुरबार : जिल्ह्यातील पपई लागवड जवळपास आटोपली असून, खानदेशात मिळून सुमारे पाच हजार हेक्‍टरवर लागवड झाल्याचा अंदाज आहे. या हंगामात सर्वत्र मिळून ४०० ते ४५० हेक्‍टरने क्षेत्र कमी झाल्याचा अंदाज आहे.  नंदुरबारमधील नंदुरबार, तळोदा, शहादा, धुळ्यातील शिरपूर, शिंदखेडा, धुळे, जळगावमधील चोपडा, यावल, रावेर, जामनेर, पाचोरा भागांत लागवड अधिक केली जाते. यातील पाणीटंचाई तापीकाठ वगळता सर्वत्र आहे. यामुळे जामनेर, पाचोरा, शिंदखेडा, धुळे, नंदुरबार या भागांत लागवड कमी झाली आहे. तर चोपडा, यावल, रावेर, शिरपूर, शहादा, तळोदा भागात क्षेत्र स्थिर आहे. नंदुरबार जिल्ह्यात दरवर्षी दोन ते अडीच हजार हेक्‍टरवर असते. नंदुरबार व शहादामधील पूर्व भागात पाणीटंचाईचा फटका पिकाला बसला आहे. जळगाव जिल्ह्यातही सुमारे १८० हेक्‍टरने क्षेत्र कमी झाले आहे. धुळे जिल्ह्यातील शिंदखेडा, शिरपूर व धुळे तालुक्‍यात दरवर्षी मिळून २०० ते ३५० हेक्‍टरवर लागवड असते. परंतु या भागातही लागवड सुमारे १०० हेक्‍टरने कमी झाल्याचा अंदाज आहे.