आरेगाव, जि. यवतमाळ : पुसद तालुक्यात सोमवार (ता. १५) पासून ‘पणन’ची शासकीय खरेदी बंद करण्यात आली आहे. शासकीय खरेदी बंद झाली असली तरी खासगीमध्येही जगदंबा ॲग्रो, वरुड व गिरीश ॲग्रो, शेलू या दोन्ही खासगी कापूस खरेदी केंद्रांवर कापसाची आवक नसल्याने जिन बंद करण्यात येणार असल्याची माहिती सूत्रांनी दिली.

वरुड येथील जगदंबा ॲग्रो येथे ‘पणन’ची शासकीय कापूस खरेदी बंद करण्यात आली. यामध्ये ४३ हजार ९३३.७१ क्विंटल कापूस घेण्यात आला.तर याच खरेदी केंद्रावर खासगीत केवळ ५००० हजार क्विंटल व शेलू येथील गिरीश ॲग्रो येथे २८००० हजार क्विंटल कापसाची खरेदी करण्यात आली असल्याची माहिती सूत्रांनी दिली.

दरम्यान कापसाचे दर वाढताच शासकीय कापूस खरेदी केंद्राकडे शेतकऱ्यांनी पाठ फिरवली होती. आज रोजी खासगीत कापसाला ६००० हजार रुपयांवर प्रतिक्विंटल दर मिळत असल्याने खेडा खरेदी करणारे खासगी व्यापारी जागेहून या भावात खरेदी करून कापसाची मोठी बाजारपेठ असलेल्या ठिकाणी नेऊन अधिक दरात कापूस विक्री करत आहे. याचाच परिणाम येथील खासगी कापूस खरेदी केंद्रावर झाला असून कापूस खरेदी बंद करण्यात येणार आहे.

आवक नसल्याने जिनिंग वरील मजुरवर्गाला कोणते काम लावावे, असा प्रश्न जिनिंग मालका समोर उभा राहिला आहे. तर यंदा कापसाच्या उत्पादनात घट येऊन कापूस उत्पादक शेतकऱ्यांनी दिवाळीपूर्वीच व उर्वरित शेतकऱ्यांनी ‘पणन’ला कापूस विक्री केला आहे. बहुतांश शेतकऱ्यांकडे घरी कापूस नसल्याचे सांगितले जात आहे. तर दरवाढ होत असल्याने फरदड घेऊन कापूस घेण्याचा प्रयत्न शेतकरी करीत आहेत.

यंदा ‘पणन’ची खरेदी लवकरच आटोपली. यातच खरेदीही कमी झाली तर खासगीतही कापसाची आवक नसल्याने बाहेर जिल्ह्यातून बोलाविलेल्या कुशल कामगारांना बसून मजुरी द्यावी लागत आहे. यामुळेच खरेदी बंद करण्याचा निर्णय घेतला आहे. खेडा खरेदी करणारा व्यापारी वर्ग बाहेर ठिकाणी कापूस विक्रीस नेत आहे. - आशिष चक्करवार, संचालक जगदंबा ॲग्रो, वरुड