पुणे  ः यंदाच्या खरिपात भात उत्पादनवाढीसाठी जिल्ह्यातील मावळ, मुळशी, भोर, वेल्हा, आंबेगाव, जुन्नर, खेड या तालुक्यांत एकूण २२० हेक्टरवर भातपीक प्रात्यक्षिक प्रकल्प राबविण्यात येणार आहे. त्यासाठी ४७ लाख ५ हजार रुपयांचा निधी प्रस्तावित केला आहे. या योजनेचा लाभ घेण्यासाठी भात उत्पादकांनी संबंधित तालुका कृषी अधिकाऱ्यांशी संपर्क साधावा, असे आवाहन कृषी विभागाने केले आहे. 

राष्ट्रीय अन्नसुरक्षा अभियानाअंतर्गत भात उत्पादन वाढविण्यासाठी प्रकल्प ‘आत्मा’कडे नोंदणीकृत असलेल्या गटांना प्राधान्य देण्यात येणार आहे. यामध्ये चारसूत्री पद्धतीने भात लागवडीचे १८ प्रकल्प राबविण्यात येत आहेत. पीक पद्धतीवर आधारित चार प्रात्यक्षिके राबविण्यात येणार आहेत. दहा हेक्टरचा एक प्रकल्प असून, गटातील प्रत्येक शेतकऱ्याला एक एकराचा लाभ दिला जाणार आहे. यामध्ये तंत्रज्ञानाचा अवलंब करण्याची मानसिकता असलेल्या शेतकरी गटांची निवड केली जाणार आहे. 

यामध्ये शेतकरी प्रशिक्षणे, ग्रामबीजोत्पादन, प्रमाणित बियाणे दिले जाणार असून खते, जैविक खते, जैविक कीटकनाशकांची खरेदी गटांना करावी लागणार आहे. त्यानंतर डीबीटीद्वारे गटांच्या बॅंक खात्यामध्ये अनुदानाची रक्कम जमा केली जाणार आहे.

सध्या भातपट्ट्यातील खडकाळा (ता. मावळ), संगमनेर (ता. भोर) व भुकूम (ता. मुळशी) येथे ‘फुले समृद्धी़’ या वाणाचे बियाणे उपलब्ध आहेत; तसेच तालुका बीज गुणन केंद्र किंवा फळरोपवाटिका केंद्रावर युरिया ब्रिकेटसुद्धा उपलब्ध करून दिले जाणार आहे. याशिवाय निवडलेल्या शेतकरी गटांना कृषीतज्ज्ञ, अधिकारी मार्गदर्शन करणार आहेत.