रत्नागिरी  ः अरबी समुद्रातील कमी दाबाचा पट्टा आणि बंगालच्या उपसागरावरील कमी दाबाचे क्षेत्र यामुळे कोकण किनारपट्टीला पावसाचा तडाखा बसला आहे. त्याचा परिणाम येथील भात उत्पादनावर होणार असून ओल्या दुष्काळाचे सावट निर्माण झाले आहे. रत्नागिरी जिल्ह्यात तयार झालेले भात पीक आडवे झाल्यामुळे ते पुन्हा रुजून आले आहे. पावसामुळे सुमारे २५ हजार हेक्टरवरील निमगरवी भातपिकं धोक्यात आली आहेत.

जिल्ह्यात १ जूनपासून आतापर्यंत सरासरी ४९३६ मिलिमीटर पावसाची नोंद झालेली आहे. गतवर्षीच्या तुलनेत १३०० मिमी पाऊस अधिक झाला आहे. यंदा मोसमी पावसाला उशिराने सुरवात झाली; मात्र चारही महिने पावसाचा जोर कायम झाला. विजांचा कडकडाट आणि वादळी वाऱ्यासह पावसाने जिल्ह्याला चांगलेच झोडपून काढले. जिल्ह्यात यावर्षी ६९ हजार हेक्टरवर भात लागवड झाली. त्यात हळवी भात पिके १० हजार हेक्टरवर असून सुमारे २० ते २५ हजार हेक्टरवर निमगरवी भाताची लागवड झालेली आहे.

नवरात्री दरम्यान तयार झालेल्या हळवी भाताची कापणी पूर्ण झाली होती. निमगरवी भात कापणी योग्य झालेला असतानाच पावसाने गाठले. सप्टेंबर अखेरपर्यंतच पाऊस राहील अशी शक्यता होती; मात्र ऑक्टोबर संपत आला तरीही मॉन्सूनोत्तर पावसाचा जोर कायम राहिला आहे. सलग आठवडाभर पाऊस पडत असल्यामुळे भात शेतीचे नुकसान झाले आहे. तयार झालेले भात पीक आडवे होऊन पाण्यात भिजत आहे. अनेक ठिकाणी भाताला मोड आले आहेत तर काही ठिकाणी भात पुन्हा रुजला आहे.

गेल्या दहा वर्षांत प्रथमच एवढ्या मोठ्याप्रमाणात अशी अवस्था निर्माण झाली आहे. दिवसभर ढगाळ हवामान राहत असल्यामुळे भातकापणी करण्याचे धाडस शेतकरी करीत नाहीत. ज्यांनी भातकापणी केली, ते शेतकरी अडचणीत आले आहे. रत्नागिरी, सिंधुदुर्ग जिल्ह्यांत अशीच स्थिती असून ओल्या दुष्काळाची भीती वर्तविली जात आहे.