नागपूर : हिवाळी अधिवेशनाच्या दुसऱ्या दिवशी मंगळवारी (ता. १२) विरोधकांनी शेतकऱ्यांच्या कर्जमाफीच्या मुद्यावर विधानसभा आणि विधान परिषद सभागृहात राज्य सरकार विरोधात जोरदार घोषणाबाजी केली. गदारोळ वाढल्यामुळे दोन्ही सभागृहांचे कामकाज दुपारपूर्वीच दिवसभरासाठी तहकूब करण्यात आले. मंगळवारी दिवसाच्या कामकाजाला सुरवात होण्यापूर्वी विधान भवनाच्या पायऱ्यांवर काँग्रेस-राष्ट्रवादीच्या आमदारांनी सरकार विरोधात आंदोलन केले. गली गली में शोर है, सरकार चोर है, “शेतकऱ्यांना न्याय देता येत नसेल तर सत्तेतून खाली या, अशा घोषणांनी विधानभवन परिसर दणाणून सोडला.

त्यानंतर सभागृहाचे कामकाज सुरू होताच अध्यक्ष हरिभाऊ बागडे यांनी प्रश्नोत्तराचा तास पुकारला. मात्र, शेतकऱ्यांच्या कर्जमाफीच्या मुद्यावर विरोधक सभागृहातही आक्रमक राहिले. विरोधकांनी अध्यक्षांसमोरील मोकळ्या जागेत धाव घेत राज्य सरकारचा निषेध नोंदवला. परिणामी सभागृहाचे कामकाज आधी तीन वेळा तहकूब झाले. गदारोळ सुरूच राहिल्याने बाराच्या सुमाराला कामकाज दिवसभरासाठी तहकूब करण्यात आले आहे. या गदारोळात सरकारने काही शासकीय कामकाज उरकून घेतले. तिकडे विधान परिषदेतही शेतकरी कर्जमाफीसह शेतीच्या इतर प्रश्नांवर विरोधकांनी केलेल्या गदारोळामुळे सभागृहाचे कामकाज दिवसभरासाठी तहकूब करण्यात आले. सभागृहाचे कामकाज सुरू होताच सभापती रामराजे नाईक निंबाळकर यांनी प्रश्नोत्तराचा तास पुकारला मात्र विरोधक आक्रमक पवित्र्यात होते. विरोधीपक्षाच्या आमदारांनी सरकारविरोधात जोरदार घोषणाबाजी सुरू केली.

या गदारोळातच संसदीय कामकाज मंत्री गिरीश बापट यांनी सभागृहाचे कामकाज लोकशाही मार्गाने चालले पाहिजे असे सांगत कामकाज सुरू करण्याचे आवाहन सभापतींना केले. मात्र, गदारोळामुळे कामकाज पहिल्यांदा एक वाजेपर्यंत दोनदा आणि नंतर दिवसभरासाठी तहकूब करण्यात आले. छत्रपती शिवाजी महाराज शेतकरी सन्मान या कर्जमाफीच्या योजनेसाठी १५ हजार कोटी रुपयांची तरतूद असलेल्या २०१७-१८ च्या २६ हजार ४०२ कोटी रुपयांच्या पुरवणी मागण्या आणि इतर कागदपत्रे सभागृहासमोर मांडण्यात आली.