हिंगोली ः हिंगोली जिल्ह्यातील सर्वच बॅंकांनी यंदा खरीप पीक कर्जवाटपात हात आखडता आहे. आजवर जिल्ह्यातील २८ हजार ९१८ शेतकऱ्यांना १३५ कोटी ८ लाख ७ हजार ५४० रुपये (११.६३ टक्के) पीककर्जाचे वाटप करण्यात आले. सर्वच बॅंकांची पीक कर्जवाटपाची गती अतिशय संथ आहे. त्यामुळे सप्टेंबरअखेर पर्यंत पीककर्जाची उद्दिष्टपूर्ती होणे शक्य दिसत नाही.

यंदा (२०१९-२०) च्या खरीप हंगामात जिल्ह्यातील बॅंकांना १ हजार १६१ कोटी ९६ लाख ७७ हजार रुपये एवढे पीक कर्जवाटपाचे उद्दिष्ट होते. यामध्ये राष्ट्रीयीकृत बॅंकांना सर्वाधिक ८५३ कोटी ९६ लाख ७७ लाख रुपये, महाराष्ट्र ग्रामीण बॅंकेला १६० कोटी रुपये, जिल्हा मध्यवर्ती सहकारी बॅंकेला १४८ कोटी रुपये उद्दिष्टाचा समावेश होता. 

आजवर राष्ट्रीयीकृत बॅंकांनी ५ हजार २९१ शेतकऱ्यांना ५७ कोटी ३३ लाख ११ हजार रुपये (६.७१ टक्के), महाराष्ट्र ग्रामीण बॅंकेने ३ हजार ४६६ शेतकऱ्यांना २४ कोटी १० लाख ९८ हजार रुपये (१५.०७ टक्के), जिल्हा मध्यवर्ती सहकारी बॅंकेने २० हजार १६१ शेतकऱ्यांना ५३ कोटी ६४ लाख ४५ हजार रुपये (३६.२५ टक्के) पीक कर्जवाटप केले आहे. जिल्ह्यातील सर्वच बॅंकांच्या पीक कर्जवाटपाची गती अतिशय संथ आहे. त्यामुळे खरीप पीक कर्जवाटपाचे उद्दिष्ट सप्टेंबर अखेर पूर्ण होण्याची शक्यता दिसत नाही.