पुणे ः पावसाच्या खंडाचा परिणाम रब्बी हंगामातील पेरण्यावर झाला आहे. पावसाअभावी अनेक भागांत पुरेशी ओल नसल्याने रब्बीच्या पेरण्या खोळंबल्या आहेत. पुणे विभागातील नगर, पुणे, सोलापूर जिल्ह्यात आत्तापर्यंत सरासरीच्या १७ लाख ८१ हजार ३५ हेक्टरपैकी केवळ एक लाख ८८ हजार ८६२ हेक्टर म्हणजेच ११ टक्के पेरणी झाल्याचे चित्र आहे.

पुरेसा पाऊस न पडल्याने जमिनीत ओलाव्याचे प्रमाण कमी असल्यामुळे पेरणीच्या क्षेत्रात काही प्रमाणात घट होणार असल्याची स्थिती आहे. पाण्याची सुविधा असलेल्या शेतकऱ्यांनी हंगामात गहू, ज्वारी, बाजरी पेरणीचे नियोजन केले आहे. यामध्ये सर्वाधिक क्षेत्र रब्बी ज्वारीचे आहे. विभागात रब्बी ज्वारीचे सरासरी १३ लाख ५ हजार ४१० हेक्टर क्षेत्र आहे. गव्हाचे एक लाख ५४ हजार ८४० हेक्टर क्षेत्र आहे. त्यापाठोपाठ हरभरा पिकांचे दोन लाख १७ हजार २२० हेक्टर क्षेत्र आहे. मक्याचे ७८ हजार ९५० हेक्टर क्षेत्र आहे.

यंदा विभागातील नगर जिल्ह्यात रब्बी हंगामातील ज्वारी पिकांची ९७ हजार ४५६ हेक्टर, हरभरा ५ हजार ६९६ हेक्टर व मका ८६१ हेक्टरवर पेरणी झाली. जिल्ह्यामध्ये पुरेसा पाऊस न झाल्यामुळे उर्वरित पिकांच्या पेरण्या खोळंबल्या आहेत. पुणे जिल्ह्यात खरिपातील भात पिके दाणे भरण्याच्या अवस्थेत असून काही ठिकाणी काढणीस सुरवात झाली आहे.

पूर्व पट्ट्यातील तालुक्यात पुरेसा पाऊस न झाल्यामुळे जमिनीत ओलाव्याचे प्रमाण अत्यंत कमी आहे. त्यामुळे रब्बी ज्वारीची केवळ २९ हजार ३२४ हेक्टर, मका १२००, हरभरा ३१८३ हेक्टरवर पेरणी झाली. करडई, सूर्यफुल, गहू या पिकांच्या पेरण्या खोळंबल्याचे चित्र आहे. सोलापूर जिल्ह्यात खरिपातील मूग, उडीद पिकांची काढणी झाली आहे. अनेक शेतकऱ्यांनी रब्बी हंगामातील पिकांच्या पेरणी तयारी केली आहे. मात्र, पुरेशा ओलीअभावी पेरण्या खोळंबल्या असून ज्वारी पिकांची अवघ्या ४४ हजार ८७७ हेक्टर, मका ३३०७, हरभरा २५२५ व सूर्यफूल ११९ हेक्टरवर पिकांची हेक्टरवर पेरणी झाली आहे.