सांगली: हळदीपाठोपाठ बेदाण्याचेही ऑनलाइन सौदे सुरू करण्याचे प्रयत्न सुरू झाले आहेत. याबाबत प्राथमिक बैठक घेवून चर्चा करण्यात आली. बुधवारी (ता. ६) बेदाण्याचे सौदे सुरू करण्याबाबत बाजार समिती व्यापारी जिल्हा उपनिबंधक यांच्यात बैठक घेणार आहे. पुढील आठवड्यात बेदाण्याचे ऑनलाईन सौदे सुरू होण्याची शक्यता असल्याचे सभापती दिनकर पाटील यांनी सांगितले.  बाजार समितीमध्ये ऑनलाइन बेदाणा सौदे काढण्याबाबत प्रशासन आणि व्यापारी यांच्यात बैठक झाली. यावेळी जिल्हा उपनिबंधक निळकंठ करे, बेदाणा व्यापारी राजेंद्र कुंभार, शितल पाटील, सुशिल हडदरे आदी उपस्थित होते. लॉकडाऊनमुळे मार्केट यार्डातील सौदे महिनाभर बंद होते. सौदे बंद राहील्याने बाजारपेठेवर मोठा परिणाम होत होता. शिवाय शेतकऱ्यांसमोरही अडचणी निर्माण झाल्या होत्या. हळद व बेदाण्याची विक्री थांबली होती. सौदे लवकर सुरू झाले नाहीत, तर अडचणी वाढणार होत्या. एकाच वेळी मोठी आवक झाली तर मालाचे हळद व बेदाण्याचे दर पडण्याची भिती होती. त्यामुळेच जिल्हाधिकारी डॉ. अभिजित चौधरी यांनी ऑनलाइन सौदे सुरू करण्याचे आदेश दिले. मागील आठवड्यात मार्केट यार्डात हळदीचे ऑनलाइन सौदे सुरू करण्यात आले आहेत, त्याला चांगला प्रतिसाद मिळत असल्याने बेदाण्याचे ऑनलाईन सौदे काढण्याबाबत चर्चा करण्यात आली. 

त्यामध्ये संभाव्य अडचणींबाबत चर्चा करण्यात आली. बुधवारी बाजार समितीत याबाबत सविस्तर बैठक घेण्याचा निर्णय घेण्यात आला. अडचणी कोणत्या आहेत, कोणत्या अडचणी येऊ शकतात यावर चर्चा करून धोरण ठरविण्यात येणार आहे. त्यानंतर ऑनलाइन बेदाणे सौदे सुरू करण्याबाबत प्रक्रिया सुरू केली जाईल. नोंदणी प्रक्रिया पूर्ण करून पुढील आठवड्यात बेदाण्याचे ऑनलाइन सौदे सुरू करण्याचा प्रयत्न करण्याचे निश्चित करण्यात आले.