लोणंद, जि. सातारा : कांद्याची आवक घटल्याने लोणंद कृषी उत्पन्न बाजार समितीच्या आवारात गुरुवारी झालेल्या कांद्याच्या सौद्यात नव्या हळव्या लाल कांद्याचे दर प्रतिक्विंटलला दहा हजार रुपये, तर जुन्या गरव्या कांद्याचे दर अकरा हजार रुपयांपर्यंत तेजीत निघाले. तर १०० ते १३० रुपये प्रति किलोने कांद्याची किरकोळ विक्री केली जात आहे. 

लोणंद कृषी उत्पन्न बाजार समितीच्या आवारात दर वर्षी दिवाळीपूर्वी व दिवाळीनंतर हळव्या लाल कांद्याचा हंगाम सुरू होतो. मात्र, यावर्षी सर्वत्रच झालेल्या जोरदार पावसामुळे हातातोंडाशी आलेले कांद्याचे पीक वाया गेले आहे. शेतात पाणी साचल्याने तयार होऊ लागलेला व तयार झालेला कांदा शेतातच नासून गेला. रोपेही नासून गेली आहेत. त्यामुळे शेतकऱ्यांनी शेतातच कांदा पीक सोडले आहे. त्यातून काही वाचलेला कांदा काढून शेतकरी वर्ग सध्या निवडून प्रतवारी करून बाजारात विक्रीसाठी आणत आहेत, तर गरव्या कांद्याच्या लागवडी गेल्या महिनाभरापासून सर्वत्र वेगात सुरू आहेत. 

फलटणच्या पूर्व भागातील दुधेबावी, भाडळे, तसेच माण व खंडाळा तालुक्‍यांतूनही नवीन हळवा लाल कांदा बाजारात विक्रीसाठी येऊ लागला आहे, तसेच जुन्या साठवणुकीच्या गरव्या कांद्याचीही तुरळक आवक होत आहे. त्यामुळे बाजारात कांद्याची काहीशी आवक वाढताना दिसत आहे. लोणंद मार्केट यार्डात गुरूवारी झालेल्या कांद्याच्या बाजारात हळव्या कांद्याच्या ७५० पिशव्यांची आवक झाल्याची माहिती बाजार समितीचे सभापती राजेंद्र तांबे व उपसभापती दत्तात्रय बिचुकले यांनी दिली. 

लोणंद बाजारात ऑक्‍टोबर महिन्यापासून कांद्याचे दर तेजीत आहे. गेल्या दोन आठवड्यात तर ७५०० वरून ९१०० रुपयांपर्यंत ही वाढ पोचली. प्रति क्विंटलला उच्चांकी ११ हजार रुपये इतकी भाववाढ झाली आहे.

प्रतवारीनुसार कांद्याचे दर क्विंटलमध्ये पुढीलप्रमाणे   हळवा लाल कांदा नंबर एक - सात ते दहा हजार रुपये, हळवा कांदा नंबर दोन - ३,५०० ते सात हजार, हळवा कांदा नंबर तीन - एक हजार ते ३,५००, तर जुना साठवणुकीचा गरवा कांदा पाच ते ११ हजार रुपये. दरम्यान शेतकऱ्यांनी कांद्याची प्रतवारी करून निवडून व चांगला वाळवून बाजारात विक्रीसाठी आणावा, असे आवाहन बाजार समितीचे सचिव विठ्ठल सपकाळ यांनी केले आहे.