जळगाव  ः खानदेशात कांदा विपणन व्यवस्थेसंबंधी जळगाव, चाळीसगाव, अडावद (ता.चोपडा) व किनगाव (ता.यावल) येथील बाजार समित्यांमध्ये शेतकऱ्यांना वाईट अनुभव येत असल्याने आगामी हंगामात लाल कांद्याची लागवड कमी होईल, असे संकेत मिळत आहे.  कांद्याचे दर लासलगाव (जि. नाशिक), सोलापूर, राहता (जि. नगर) या भागात १३०० ते १५०० रुपये प्रतिक्विंटलपर्यंत आहेत. मध्य प्रदेशातील इंदूर, बडवानी येथील बाजारातील तरही १३०० रुपयांवर पोचले आहेत. असे असताना जळगाव जिल्ह्यातील बाजार समित्यांमध्ये मात्र नफेखोर खरेदीदार व अडतदारांच्या मनमानी कारभारामुळे दर १२०० रुपयांवर पोचले नाहीत. इतर ठिकाणी दर बऱ्यापैकी असतात, मग जळगावातच दर का कमी? असा प्रश्‍न शेतकरी उपस्थित करीत आहेत. बाजार समित्यांमधील विपणन व्यवस्थेवर जिल्हा उपनिबंधक कार्यालयासह इतर यंत्रणांचेदेखील लक्ष नाही. तपासणी, चौकशी, दरांची अंमलबजावणी, तोलाईचे वाढीव दर, तागाच्या गोण्यांचे अवाजवी दर या संदर्भात कुठलेही नियंत्रण जिल्हा उपनिबंधक कार्यालय आणत नसल्याने शेतकऱ्यांनी नाराजी व्यक्त केली आहे. परिणामी पुढे कांदा रोपवाटिका व लागवडही कमी होईल, असे शेतकऱ्यांचे म्हणणे आहे.  जळगाव जिल्ह्यात केळी, पपईनंतर कांदा पिकाची लागवड वाढू लागली होती. तापी व गिरणाकाठी कांदा पीक वाढले होते. परंतु मागील वर्षभरात कांदा उत्पादकांना अडतदार व खरेदीदारांच्या मिलिभगतमुळे नुकसानीचा सामना करावा लागला आहे. यामुळे पुढे नुकसान टाळण्यासाठी शेतकरी लागवड कमी करतील. यामुळे कांदा बियाणे बाजारातही फारशी उलाढाल होणार नाही, असे सांगण्यात आले.