सांगली : मिरज तालुक्‍याच्या पूर्व भागातील खटाव गावातील कापसावर बोंड अळीने प्रादुर्भाव झालेल्या क्षेत्राचे कृषी विभागाने पंचनामे करून पंधरा दिवस झाले. ज्या कृषी निविष्ठा खरेदी केंद्रातून कापसाचे बियाणे खरेदी केले, त्याची पावती कृषी अधिकाऱ्यांना द्या, अशी नोटीस कृषी विभागाने पाठविली. मात्र शेतकऱ्यांकडील पावती घेण्यास कृषी विभागाचे अधिकरी टाळाटाळ करत आहेत.

शेतकऱ्यांनी संबंधित अधिकाऱ्यांना फोनद्वारे संपर्क केला असता मी रजेवर आहे, आज मीटिंग आहे, अशी उत्तरे देऊ लागले आहे. पंचनामे केलेला अहवाल अद्यापही कृषी आयुक्तालयामध्ये सादरच केलेला नाही. यामुळे पुन्हा एकदा कृषी विभागाच्या कामावर शंका उपस्थित होऊ लागली आहे.

सांगली जिल्ह्यातील मिरज पूर्व भागात सुमारे १२ हेक्‍टर कापसाचे क्षेत्र असून, या भागातील ३९ शेतकऱ्यांनी कापसाची लागवड केली आहे. या पिकावर बोंड अळीचा प्रादुर्भाव झाला होता. त्याची बातमी ॲग्रोवनमध्ये प्रसिद्ध झाल्यानंतर कृषी विभागाने पंचनामे केले. पंचनामे होऊन पंधरा दिवस उलटून गेल्यानंतर कृषी विभागाने ३९ शेतकऱ्यांना नोटिसा दिल्या. या नोटिसांमध्ये बियाणे खरेदीच्या पावत्या मागितल्या.

शेतकऱ्यांनी पावत्या जवळ ठेवल्या आहेत. पावत्या जमा करण्यासाठी कृषी विभागाचे अधिकारी गावात येणार होते. पण अद्यापही  पावत्या कृषी विभागाने जमा करून घेतेल्या नाही.

कृषी विभागाने केवळ पंचनामे करून उपयोग नाही, तर पंचनामे केलेला अहवाल कृषी आयुक्ताला सादर केला पाहिजे. परंतु हा अहवाल अद्यापही कृषी आयुक्तालयामध्ये सादर केला नाही. यामुळे शेतकरी नुकसान भरपाईपासून वंचित राहण्याची भीती व्यक्त केली जाते आहे.

कापसाचे पंचनामे करून पंधरा दिवस उलटून गेले. आम्हाला बियाणे केलेल्या पावत्या मागितल्या आहेत, पण या पावत्या घेण्यासाठी कृषी विभागाचे अधिकारीच गावात येत नाहीत.                                    - कुमार कोरणगे, खटाव, ता. मिरज.