पुणे : ई-ग्रामपंचायत राज्यस्तरीय सरळसेवा निवड समितीच्या वतीने ‘ई-ग्रामपंचायत प्रकल्प भरती’ परीक्षा प्रक्रिया राबण्यात येत असल्याची जाहिरात सध्या सोशल मीडियावर व्हायरल झाली आहे. अशी कोणतीही भरती परीक्षा पुणे जिल्हा परिषदेकडून घेण्यात येत नसून, सोशल मीडियावर फिरणारे संकेतस्थळ ग्रामपंचायत विभागाचे नाही. जाहिरात देणाऱ्या विरोधात बंडगार्डन पोलिस ठाण्यात गुन्हा दाखल करण्यात आला आहे, अशी माहिती जिल्हा परिषदेचे मुख्य कार्यकारी अधिकारी आयुष प्रसाद यांनी दिली. 

फेसबुक आणि व्हॉट्सअ‍ॅपवर ही जाहिरात व्हायरल होत आहे. या जाहिरातीतील पदांसाठी उमेदवारांकडून अर्ज मागविण्यात येत आहेत. याविरुद्ध ग्रामविकास विभागाकडून जिल्हा परिषदेला गुन्हा दाखल करण्याचे आदेश दिले होते. त्यानुसार जिल्हा परिषदेच्या मुख्य कार्यकारी अधिकाऱ्यांच्या सूचनेवरून ग्रामपंचायत विभागाचे उपमुख्य कार्यकारी अधिकारी संदीप कोहिनकर यांनी अज्ञात व्यक्तीविरुद्ध तक्रार दिली आहे. 

ऑनलाइन पद्धतीने अर्ज भरण्याची सुविधा फक्त संकेतस्थळावर आहे, अशी खोटी जाहिरात देऊन आणि महाराष्ट्र शासन ग्रामविकास विभागाचे सादरीकरण एप्रिल २०२० असे होमपेज तयार करून त्या संकेतस्थळाचा उल्लेख करून शासनातर्फे भरती आहे, असे भासविण्यात आले. ते सोशल मीडियावर व्हायरल करण्यात आले. त्यामुळे तरुणांची दिशाभूल झाली आहे. याशिवाय तरुणांकडून अर्ज शुल्क म्हणून पाचशे रुपये ऑनलाइन पैसे देखील भरण्यास सांगण्यात आले होते. या बाबत बंडगार्डन पोलिसांनी अज्ञात व्यक्तीविरुद्ध गुन्हा दाखल केला आहे.