अकोले, जि. नगर : उत्तर नगर जिल्ह्याला वरदान ठरणारे निळवंडे धरण बुधवारी (ता. २३) पहाटे ४ वाजता पूर्ण क्षमतेने भरले आहे. या जलाशयाची पाणी पातळी ६४८.१६० मीटर तर पाणीसाठा ८३२८ दशलक्ष घनफूट झाल्याने हे जलाशय शंभर टक्के भरल्याचे शाखा अभियंता अरविंद जाधव यांनी सांगितले.

त्यामुळे वीज निर्मिती प्रकल्प व स्पिलवे मधून १६०० क्युसेक विसर्ग सुरू आहे. भंडारदरा पाणलोट क्षेत्रातही पावसाने जोरदार हजेरी लावली असून घाटघर मध्ये ६६ मिलिमीटर इतका पाऊस झाल्याने आत्तापर्यंत ६२२० मिलिमीटर २०५ इंच पावसाची नोंद झाली आहे . तर त्याखालोखाल रतनवाडी येथे ६० मिलिमीटर एकूण ४७६० मिलिमीटर पाऊस झाला. तसेच भंडारदरा ४५, पांजरे ५८, वाकी ४० मिलिमीटर पाऊस झाला आहे.

भंडारदरा जलाशय देखील १०० टक्के भरले असून जलाशयातून ८१२ क्युसेक विद्युत ग्रहातून पाणी सोडण्यात येत आहे. त्यामुळे भंडारदरा वीज निर्मिती सुरू झाली आहे. तर वाकी जलाशयातून १९७ क्युसेक विसर्ग सुरू असल्याचे शाखा अभियंता अभिजित देशमुख यांनी सांगितले. तर तालुक्यातील सर्व २४ जलाशय भरले असल्याचे कार्यकारी अभियंता ए. इ. नानोर यांनी सांगितले.