पुणे : एकात्मिक फलोत्पादन अभियानातील (एनएचएम) घटकासाठी शेतकऱ्यांना अर्ज करण्यासाठी १९ जून रोजी दहा दिवसांची मुदतवाढ देण्यात आली आहे. शेतकऱ्यांना आता ३० जूनपर्यंत अर्ज करता येणार आहे. तसेच राज्यातील सर्व तालुका व जिल्हास्तरीय सोडत दहा जुलै या एकाच दिवशी होणार असल्याची माहिती राष्ट्रीय फलोत्पादन अभियानाचे संचालक प्रल्हाद पोकळे यांनी दिली.  या योजनेअंतर्गत हरितगृह, शेडनेट, शेततळे अस्तरीकरण, हरितगृहातील उच्च दर्जाचे लागवड साहित्य, फुले व भाजीपाला, ट्रँकर, पाॅवर टिलर, शीतगृह, रायपनिग चेंबर, रेफर व्हँन, पीक संरक्षणे, प्राथमिक प्रक्रिया केंद्र, कांदा चाळ उभारणी, मधुमक्षिकापालन या घटकाकरिता आँनलाईन अर्ज करता येणार आहे. सामूहिक शेततळे या घटकाकरिता फक्त अनुसूचित जाती व अनुसूचित जमातीच्या शेतकऱ्यांना अर्ज करता येणार आहे. शेतकऱ्यांनी www.hortnet.gov.in या संकेतस्थळावर आॅनलाईन पद्धतीने अर्ज करायचे आहेत. शेतकऱ्यांना या घटकाअंतर्गत सहाशे ते एक लाख रुपयापर्यंत अनुदान देण्यात येणार आहे. शेतकऱ्यांनी नोंदणीकरिता सात बारा उतारा, आठ अ, आधार कार्ड, आधारकार्ड लिक बँक खाते, पासबुक झेराॅक्स, हमीपत्र, जात प्रमाणपत्र आवश्यक आहे.  अधिक माहितीसाठी जवळच्या तालुका कृषी अधिकारी, मंडळकृषी अधिकारी, कृषी सहाय्यक यांच्याशी संपर्क साधावा, असे आवाहन श्री. पोकळे यांनी केले.  योजनेअंतर्गत अर्ज करण्यासाठी अंतिम मुदत २० जून ठेवण्यात आली होती. या योजनेस शेतकऱ्यांनी चांगला प्रतिसाद दिला असून आतापर्यंत एक लाख पंचवीस हजार अर्ज दाखल झाले आहेत. अजूनही अनेक शेतकरी अर्ज करण्याचे शिल्लक असून अर्जासाठी मुदतवाढ करण्याची मागणीचे संदेश येत होते. त्यामुळे दहा दिवस म्हणजेच ३० जूनपर्यंत मुदतवाढ देण्यात आली आहे.  - प्रल्हाद पोकळे, संचालक, राष्ट्रीय फलोत्पादन अभियान