नवी दिल्ली : मे महिना सुरू झाल्यापासून देशात कोरोनाग्रस्त रुग्णांच्या वाढत्या संख्येचा कल चालूच असून मागच्या चोवीस तासांमध्ये आतापर्यंतचे सर्वाधिक ५,६११ रुग्ण आढळले आणि १४० जणांचा मृत्यू झाला, असे आरोग्य मंत्रालयाने म्हटले आहे. आरोग्य मंत्रालयाने जारी केलेल्या आकड्यानुसार देशात बुधवारी सकाळपर्यंत अधिकृत रुग्णसंख्या १ लाख ०६ हजार ७५० वर, तर मृतांची संख्या ३३०३ वर पोहोचली आहे. कोविड-१९ विषाणूचा विळख्यातून सुटका होऊन रुग्णालयातून घरी परतणार यांची संख्या ४२ हजार २९७ झाली आहे. महाराष्ट्रात बळींचा आकडा सर्वाधिक १३२५ वर गेला आहे. राजधानी दिल्लीतही रुग्णसंख्या वाढती असून राज्य सरकारने लोकडाउनच्या नियमांमध्ये शिथिलता आणून बाजारपेठा, टॅक्सी आणि ऑटो रिक्षासह बससेवा सुरू करताच पहिल्याच दिवशी चोवीस तासातील विक्रमी ५०० पेक्षा जास्त रुग्ण वाढले.