पुणे : ‘‘टाळेबंदीच्या काळात अडकलेल्या नांदेड जिल्ह्यातील ३८ मजूरांना सर्व प्रक्रिया पूर्ण करुन तीन वाहनांमधून शुक्रवारी (ता.८) पुण्यातून स्वगृही पाठविण्यात आले’’, अशी माहिती जिल्हाधिकारी नवल किशोर राम यांनी दिली. 

मजुरांना पाठविण्यापूर्वी नवल किशोर राम व नांदेडचे जिल्हाधिकारी डॉ. विपीन इटनकर यांनी समन्वय साधून याबाबत एकमेकांना परवानगी दिली. नांदेड जिल्हाधिकाऱ्यांची परवानगी आल्यानंतर या कामगारांची कोरोनाबाबत वैद्यकीय तपासणी करुन त्यांच्या वाहनांना जाण्यासाठी परवानगी देण्यात आली. ग्रामीण मुळशी तालुक्यामध्ये टाळेबंदी शिथिल केल्यामुळे उद्योगधंदे सुरु आहेत. हाताला मिळणारे काम खंडित होणार नाही, याची त्यांना कल्पना देण्यात आली. मात्र, हे मजूर थांबण्यासाठी तयार नसल्यामुळे, त्यांना रवाना करण्यात आले. 

प्रशासनाकडून योग्य ती दक्षता घेऊन सामाजिक अंतराची मर्यादा पाळून त्यांची बसण्याची व्यवस्था करण्यात आली. या ३८ प्रवाशांना नांदेड जिल्ह्यात पाठविण्यासाठी कासार आंबोली ग्रामपंचायतीचे पदाधिकारी, तलाठी पासलकर, मंडळ अधिकारी सुहास कांबळे यांनी नियोजन केले. मुळशी तालुक्याचे तहसीलदार अभय चव्हाण व पोलीस निरीक्षक अशोक धुमाळ यांनी या तीनही वाहनांतील मजूरांना प्रवासासाठी शुभेच्छा दिल्या.