नागपूर   ः बोंडअळीच्या प्रादुर्भावविषयक निरीक्षण घेता यावे याकरिता शेतकऱ्यांना या हंगामात फेरोमोन ट्रॅप अनुदानावर देण्याचा निर्णय जिल्हा परिषदेच्या कृषी समितीकडून घेण्यात आला. ५० टक्‍के अनुदानावर शेतकऱ्यांना हे ट्रॅप दिले जाणार आहेत.

जिल्ह्यात २ लाख १२ हजार ४३४ हेक्‍टरवर कापसाची लागवड झाली आहे. गेल्या वर्षीच्या हंगामात कापसावर बोंडअळीचा प्रादुर्भाव मोठ्या प्रमाणात झाला. परिणामी, या वर्षी लागवड क्षेत्रात घट होण्याचा अंदाज वर्तविला जात होता. परंतु या वर्षी कापसाखालील क्षेत्रात वाढच झाली.

लागवड झालेल्या कापसावर बोंडअळीचा प्रादुर्भाव होऊ नये याकरिता खबरदारीचा उपाय म्हणून फेरोमोन ट्रॅपचा पुरवठा अनुदानावर केला जाणार आहे. कृषी समितीच्या सदस्यांनी या संदर्भातील मागणी बैठकीत लावून धरली होती. त्यानुसार अनुदानावर ट्रॅप पुरवठ्याचा ठराव घेण्यात आला. बैठकीला विनोद पाटील, कमलाकर मेंघर, मनोज तितरमारे, पद्माकर कडू, रामदास मरकाम उपस्थित होते.